Almatyda ǵarysh monıtorıngi kómegimen 12 qoqys úıindisi tabyldy
ALMATY. QazAqparat – Byltyr Almatydan 450 myń tonnadan astam qatty turmystyq qaldyq shyǵaryldy. Bul týraly óńirlik kommýnıkatsııalar qyzmetinde ótken baspasóz máslıhatynda Almaty qalasy boıynsha ekologııa departamentiniń ókili Nurjan Bólekbaev aıtty, dep habarlaıdy QazAqparat tilshisi.
Spıkerdiń sózinshe, Almaty qalasy boıynsha, 25 jeke seriktestik qatty turmystyq qaldyqtardy shyǵarýmen aınalysady.
Olar megapolıs aýmaǵynda 94 ýchaskege qyzmet kórsetedi.
«2022 jyly kommýnaldyq qyzmetter, qoqys shyǵaratyn uıymdar Almaty qalasynyń turǵyn úı saıasaty basqarmasynyń derekteri boıynsha qoqys suryptaý keshenderine jáne Almaty oblysynyń 6 polıgonyna – 451,821 myń tonna kommýnaldyq qaldyqtardy jınap, áketti. 2021 jyldyń osyndaı kezeńinde 443 myń tonna shyǵarylǵan bolatyn» - dedi ol.
Sonymen qatar, ol Almatyda ruqsat etilmegen qoqys úıindileri anyqtalyp jatqanyn atap ótti.
«Almatyda qatty turmystyq qaldyq jınaıtyn polıgon joq. Sonyń saldarynan ruqsat etilmegen qoqys orny anyqtalyp jatyr. Byltyr ǵaryshtyq monıtorıng arqyly 12 qoqys úıindisi tabyldy»,- dedi ekologııa departamentiniń memlekettik ekologııalyq ınspektory Nurjan Bólekbaev.
