Almatyda «Garant 24» jáne «Estate» lombardtarynyń dırektorlary ustaldy
ALMATY. QazAqparat – Almatyda atalǵan eki qarjy uıymynyń óńirlik dırektorlaryn qarjylyq pıramıda qurdy degen kúdikpen polıtsııa tutqyndady, dep habarlaıdy Polisia.kz.
Almaty qalalyq Polıtsııa departamentiniń tergeý basqarmasynyń málimetteri boıynsha, jedel-izdestirý jumystarynyń barysynda «Garant 24 Lombard» jáne «Estate Lombard» sııaqty uıymdardyń dırektorlary tutqyndaldy. Olarǵa qatysty qarjy pıramıdasyn uıymdastyryp, oǵan salymshylardy tartty degen kúdik keltirilip otyr.
Aldyn ala málimetter boıynsha, atalǵan qarjy uıymdary ótken jyldyń sońynan bastap áreket ete bastaǵan. Olar salymshylardy óz uıymyna qarjy salǵan jaǵdaıda qomaqty qarjy tabatyndaryna sendirip, nátıjesinde bótenniń múlkin qylmystyq jolmen ıemdenip alǵan. Qazirgi tańda atalǵan qylmysty uıymdastyrýshylar QR QPK-niń 128 baby boıynsha tutqyndalyp, ýaqytsha ustaý ızolıatoryna qamaldy.
Osyǵan deıin qyzylordalyq polıtseılerdiń qarjy pıramıdasyn qurǵandarǵa qatysty qylmystyq is qozǵaǵandyǵy, Shyǵys Qazaqstan oblysynda «Garant 24 Lombard» JShS salymshylary 52,5 mln teńgesinen aıyrylǵandyǵy jáne «Garant 24 Lombard» uıymynyń Taraz bólimshesiniń dırektory ustalǵandyǵy jazylǵan bolatyn.
