Almatyda ǵalym, aqyn, jazýshy Baltabaı Adambaevtyń 90 jyldyǵyna arnalǵan saltanatty jıyn ótti
ALMATY. Jeltoqsannyń 23-i. QazAqparat /Erlik Erjanuly/ - Baltabaı Adambaev sheshendik sózderdiń, maqal-miátelderdiń, tarıhı ańyzdardyń jańa qyrlaryn ashty. Bul týraly búgin Almatydaǵy Ádebıetshiler úıinde ótip jatqan Baltabaı Ábdirahmanulynyń 90 jyldyǵyna arnalǵan saltanatty jıynda aıtyldy,
dep habarlaıdy QazAqparat.
"Ol ómirde de, shyǵarmashylyq qyzmette de jalǵan aıtyp, jaramsaqtanǵan kisi emes edi. Shynaıy shyndyqty aıtýǵa kelgende betiń-júziń bar demeıtin. Otanshyl, halyqshyl, kópshil bolatyn. "Turar Rysqulov týraly tolǵanystyń" týyn poezııada birinshi kótergen Baltabaı Adambaev edi. Ol 3 tomdyq "Qazaq ádebıeti tarıhyn", 10 tomdyq "Qazaq sovet entsıklopedııasyn" jazýǵa qatysyp, aıbyndy avtorlarynyń biri boldy. Qylyshynan qan tamǵan ımperııalyq zaman kezinde Baltekeń bıler sóziniń bıiktigi úshin kúresti. Ǵylymı eńbekterinde maqal-mátelderdiń máıegin terip taldap, sheshendik sózderdiń shyraıyn ashyp, dala Demosfenderiniń pálsapasyn jarqyn jaǵalaýǵa alyp shyqty", deıdi fılologııa ǵylymynyń doktory Ótegen Kúmisbaev. Onyń aıtýynsha, B. Adambaevtyń 60 jyldary jaryq kórgen "Sheshendik sózder", "Sheshendik óner" monografııalyq eńbekteri zertteýshini jańa beleske alyp shyqty. Halyq aqyl-oıynyń qaınar bulaqtary jiktelip, ǵylymı aınalymǵa tústi.
