Almatyda Galına Kúzembaeva atyndaǵy alleıa ashyldy
trong>Qarashanyń 7-si. QazAqparat /Erbol Azanbek/ - Búgin Almatydaǵy Ál-Farabı men Naýaı kósheleriniń qıylysynda «Gala TV» prodıýserlik ortalyǵynyń 15 jyldyq mereıtoıyna arnalǵan saltanatty shara ótip, belgili telejýrnalıst, prodıýserlik ortalyqtyń negizin qalaýshy Galına Kúzembaeva atyndaǵy alleıa ashyldy,
dep habarlaıdy QazAqparat.
«Gala TV» prodıýserlik ortalyǵy 1994 jyly Galına Kúzembaevanyń jetekshiligimen ashylǵan bolatyn. Ortalyq 15 jyl ishinde «Habar» arnasynan «Tilashar», «Habar- jer», orys tilindegi «Delý vremıa», «Lýchshe byt zdorovym», «NEP, fınansy», KTK arnasynan «Ekspertıza», 31 arnadan «Znak» baǵdarlamalaryn, kóptegen derekti fılmderdi kórermen nazaryna usynyp, telebaǵdarlamalardyń ózindik sheberhanasyna aınaldy. Álemdik, halyqaralyq baıqaýlarda júldeger atandy. Ortalyqtyń jetekshisi, qazaq telejýrnalıstıkasy sheberleriniń biri Galına Kúzembaeva 2006 jyldyń 2 naýryzynda ómirden ótken bolatyn.
Búgin jańa alleıanyń ashylýyna prodıýserlik ortalyqtyń qyzmetkerleri, Galına Kúzembaevanyń shákirtteri, belgili tulǵalar qatysyp, estelikterimen bólisti. QR Jýrnalıster odaǵynyń tóraǵasy Seıitqazy Mataevtyń aıtýynsha, «Gala TV» telebaǵdarlamalar jasaýda úlken mektepke aınalǵan ortalyqtyń biri.
«Galına Kúzembaeva Qazaqstandyq jýrnalıstıkanyń, Qazaq televıdenıesiniń qalyptasýyna eleýli eńbek sińirgen tulǵa edi. Búginde aramyzda joq bolsa da, onyń beınesi, eńbegi umytylmaıdy», deıdi S.Mataev.
Sharaǵa jınalǵandar alleıaǵa alǵashqy aǵashtardy ekti. «Gala TV» prodıýserlik ortalyǵy qyzmetkerleriniń aıtýynsha, bul alleıa árqashan olardyń qamqorlyǵynda bolady.
