Almatyda ǵalamshardyń 6 mıllıardynshy turǵynyna tólqujat tapsyryldy
ASTANA. QazAqparat - 1999 jyly BUU sheshimimen Jer ǵalamsharynyń 6 mıllıardynshy turǵyny dep tanylǵan almatylyq Rábııa Ermuhanova qazir 16 jasynda. Halyqaralyq beıresmı ataqqa ıe bolǵan Rábııaǵa búgin Almaty Qazaqstan azamatynyń jeke tólqujaty saltanatty túrde tabystaldy, dep habarlady www.24.kz.
16 jyl buryn dúnıe esigin jańa ashqan sábıge sáttilik serik bolyp, ǵalamshardyń 6 mıllıardynshy turǵynyna týý týraly kýálik pen eskertkish belgi berilgen bolatyn. Mamandyǵy jýrnalıst Manarbek Ermuhanov pen onyń zaıyby Almagúldiń 7 jyl kútken tuńǵyshtary ózimen birge osyndaı erekshe qýanysh ala keldi.
Rábııanyń ákesi «Balamyz osy 12 qarasha kúni týylyp, 6 mıllıardtyń ishine kiredi dep oılaǵan joqpyz», - deıdi Rábııanyń ákesi Manarbek Ermuhanov.
Baqytty otbasynda búgin taǵy qýanysh. №111 mektep-gımnazııanyń 10-synyp oqýshysy Rábııa Ermuhanova kámelettik jasqa toldy. Qyzynyń resmı túrde tólqujatyn alýǵa kelgen ata-anasy kezdeısoq sáttiliktiń de salmaǵy bar deıdi.
«Jaýapkershilik óte joǵary bolady dep esepteımin. Nege deseńiz, bul ataq beıresmı túrde bolsa da, osyndaı óziniń elin bıikten kórsetýge talpyndyrady dep oılaımyn», dedi Manarbek Ermuhanov.
Daryndy Rábııanyń búginde jetistikteri de az emes. Birneshe respýblıkalyq olımpıadalardyń júldegeri, armany da aýqymdy.
«Bıyl kóktemde geografııadan respýblıkalyq olımpıadadan júldeli oryndy ıelendim. Bul meniń armanyma jetelegen alǵashqy belestiń biri dep bilemin. Bolashaqta landshaf-dızaıneri bolǵym keledi», - dedi Jer ǵalamsharynyń 6 mıllıardynshy turǵyny Rábııa Ermuhanova.
Manarbek pen Almagúldiń otbasynda Rábııadan basqa qyzy Narı men uldary Ánýar, Mansur ósip keledi. Ata-anasy olardyń bolashaǵynan da zor úmit kútedi.
