Almatyda Gakku Daýysynyń mereıtoıyna 200 myń adam jınaldy
ALMATY. QazAqparat - Otandyq mýzykanyń eń aýqymdy festıvalin Gakku TV jáne Youtube-taǵy Gakku arnasy tikeleı efırden kórsetti, dep habarlaıdy QazAqparat Kapital.kz-ke silteme jasap.
Besinshi ret ótken Gakku Daýysy festıvaline qazaqstandyq estrada juldyzdarynyń barlyǵy qatysyp, tiri daýysta án shyrqady. Bıyl 6 saǵatqa sozylǵan mýzykalyq marafonǵa Almatydaǵy Eski alańda 200 myń adam jınaldy.
«Gakku Daýysy-2018» Qazaqstan mýzykasynyń festıvali Almaty ákimdiginiń qoldaýymen ótti. Jańa ánshiler, tanymal juldyzdar men erekshe dýetter bir sahnada án shyrqady. Festıvaldiń baǵdarlamasyna 65 ártis pen ujym, 30 bıshi qatysty. Kórermender 85 mýzykalyq nómirdi tamashalady. Shoýdy Alýa Qonarova, Baıan Alagózova, Tımýr Balymbetov pen Nurjan Erkinuly júrgizdi.
Erke Esmahan, Ninetyone toby, Ziruza, Dılnaz Ahmadıeva, Janar Duǵalova, Danelııa Tóleshova ózderiniń úzdik ánderin shyrqady.
Jandy mýzyka festıvalinde eshqandaı tosyn oqıǵa bolǵan joq. Áleýmettik jelide taraǵan qaýesetterdi TJK joqqa shyǵardy.
