Almatyda fýtboldan jetim balalar arasyndaǵy respýblıkalyq chempıonat bastaldy

Ortalyq stadıonnyń qosymsha alańyna jergilikti «Barys» (oblystyq balalar úıi, Almaty q.) jáne «Altyn uıa» (№2 balalar úıi, Almaty q.) komandalary shyqty. Bul - irikteý kezeńiniń alǵashqy oıyny.

«Aldaǵy juma kúni qarymta kezdesý ótedi. Osy eki oıynda jeńiske jetken komanda Almaty qalasynda 17-21 maýsym aralyǵynda ótetin fınaldyq oıyndarǵa qatysady. Jalpy, búgin irikteý oıyndary elimizdiń on oblysynda bastaldy. Birqatar oblystardyń balalar úıleriniń on top komandalary bir topqa biriktirildi. Solardyń jeńimpazdary Almatyǵa fınaldyq oıyndarǵa keledi. Al aqtyq kezdesýde jeńiske jetken komanda aldaǵy tamyz aıynyń aıaǵynda Italııanyń «Mılan» klýbyna sapar shegedi. Bir aptalyq sapar barysynda jeńimpaz komanda klýbtyń murajaıyn, shynyǵý-jattyǵý bazasyn aralaıdy, «Mılan» komandasynyń «A» serııasyndaǵy oıynyn tamashalaıdy. Eń bastysy, oıyn aldynda mılandyq fýtbolshylar qazaqstandyq balalarmen kezdesip, syı-syıapattaryn usynady» - dedi óz sózinde «Baýyrjan» qaıyrymdylyq qorynyń jobalar boıynsha menedjeri, «Armanyńa jaqynda» týrnıriniń bas úılestirýshisi Sáýle Qultaeva. Sonymen qatar ol ótken jylǵy jeńimpaz komanda - Aqmola oblysynyń Esil qalasyndaǵy «Esil» balalar úıi tárbıelenýshileriniń ıspanııalyq «Barselona» klýbynda bolyp qaıtqanyn, balalardyń «Barselona» oıynshylarymen kezdesip, olardyń oıyndaryna asa tánti bolǵandaryn jetkizdi. Bir aıta ketetin jaıt, ushý bıletterin barselonalyqtar ózderi kótergen. Al qalǵan shyǵandardyń barlyǵyn otandyq demeýshiler óz moıyndaryna alǵan. Esterińizge sala keteıik, «Baýyrjan» qaıyrymdylyq qory uıymdastyryp otyrǵan bul týrnır osymen ekinshi jyl ótkizilip otyr. Ótken jylǵy oıyndar 11-16 jas aralyǵyndaǵy balalar arasynda uıymdastyrylǵan. Al bıyl jasyl alańda 11-14 jas aralyǵyndaǵy balalar óner kórsetýde. Oǵan sebep, sport mektepteri jáne «Qaırat» klýbynyń mektep-ınternatyna daryndy balalar osy jas aralyǵynda qabyldanady eken. Demek, týrnırde óziniń daryndylǵyn tanytqan balalardy atalmysh qor sol mektepterge ornalastyrady.