Almatyda fýtboldan aýla komandalary jarysty
ASTANA. QazAqparat - Ál-Farabı atyndaǵy Qazaq ulttyq ýnıversıtetiniń stadıonynda fýtboldan aýla komandalary arasyndaǵy lıganyń kezekti oıyndary ótti, dep habarlaıdy aqparattyq jáne sporttyq hab.
Ádettegideı, alańǵa birinshi bolyp balalar shyqty. 700-ge jýyq jetkinshek olımpıadalyq júıe boıynsha bástesti. Jalpy 81 ujymnyń ishinde úzdik komanda ataǵyn «Shpory» fýtbolshylary aldy. Al ekinshi oryndy buǵan deıingi jarystardyń jeńimpazy FK «Bajenovter» ıelendi. Úshinshi orynǵa «Almaty» komandasy jaıǵasty.
«Biz bul jarysqa árdaıym qatysamyz, óte unaıdy. Alǵash ret altyndy jeńdik, buǵan deıin tek júldeger atanǵanbyz. Sońǵy sheshýshi oıyn qyzyqty ári tartysty ótti, «Bajenovter» komandasy óte myqty eken. Olardy jeńgenimizge asa qýanyshtymyz. Syılyqtarǵa da rızamyz, uıymdastyrýshylarǵa sheksiz alǵysymyzdy bildiremiz», - dep bólisti «Shpory» komandasynyń oıynshysy Ádilet Abaı.
Al eresekter tobynda 102 komanda tirkeldi. Osylaısha, 800-den asa qatysýshy sheberligi men keremet oıyn úlgisin kórsetti. «B» lıgasynda altyndy FK «Start» oljalady, osynshama komandanyń ishinde úzdikter qataryna tek myqty fýtbolshylar kirdi. Solardyń biri «Inter Almaty» kúmispen kúptelse, «APS» qolany qanaǵat tutty.
Jalpy jarysqa 1500-ge jýyq fýtbol áýesqoılary jınaldy, bul joly qatysýshylar sany rekordty kórsetkishti qurady.
Jeńimpazdar men júldegerler dıplomdar jáne medaldarmen marapattaldy. Sonymen qatar, olarǵa aýla lıgasynyń seriktesi «Maxi chaı» kompanııasynyń sýsyndary tabystaldy.
Aýla lıgasynyń basty maqsaty qala jastarynyń sportqa degen qyzyǵýshylyqtaryn arttyryp, fýtbol oıynyn damytý bolyp tabylady.
