Almatyda fýtbol týrnırine 1 300 jetkinshek qatysty
ASTANA. QazAqparat - Almatyda «Avıator» alańynda aýla komandalary arasynda altynshy márte fýtbol lıgasy ótti, dep habarlaıdy qalalyq Dene shynyqtyrý jáne sport basqarmasynyń baspasóz qyzmeti.
Fýtbol dodasy «Sporttyq Almaty» jobasy aıasynda, «Maxi chaı» qoldaýymen, aqysyz, olımpıada júıesine sáıkes uıymdastyryldy. Búgingi jarys qatysýshylar sany boıynsha rekordtyq kórsetkish ornatty. Jalpy, 139 komanda, 1300 áýesqoılar jarys jolyna shyqty.
Jarystarǵa segiz jastan joǵary barlyq jetkinshekter ádettegideı eki jas sanatyna bólindi - kishi jáne úlken. Birinshisi «A» - 8 jastan 14 jasqa deıin, al ekinshisi, «B» lıgasy - 15 jastan joǵary. Kishi toptyń komandalarynyń basym kópshiligi óz bapkerlerimen kelgen. Olardyń aıtýynsha, teńbil dop dodasy jetkinshekterdiń salaýatty ómir saltyn qalyptastyrýǵa, denderiniń saýlyǵyna tıgizer septigi mol.
«A» lıgasynda altyndy FK «Orda» oljalady. Olar 1:0 esebimen «Imperator» oıynshylaryn jeńdi. Al qolany «Golden» komandasynyń fýtbolshylary qanaǵat tutty.
«Búgingi jarys keremet ótti. Oıynshylardyń daıyndyǵy jaman emes, ásirese sońǵy qarsylastarymyz myqty oınady. Negizi tórtinshi ret qatysyp jatyrmyn, búgingi oıyn baǵymdy ashty desem bolady, alǵash ret jeńimpaz atandym», - dedi «Orda» FK oıynshysy Jandos Talıpov.
Eske sala ketsek, úlken lıgada jas erekshelikterine baılanysty shekteý joq, on bes jastan joǵary bolsa bolǵany. «B» lıgasynyń sheshýshi oıyny «Ele Saýlet» pen «Makanshy» arasynda ótti. Oıyn nátıjesi boıynsha altyndy «Makanshy», al qolany «Tarǵap» oıynshylary oljalady.
Shaǵyn fýtboldan týrnırler Almaty qalasynyń Dene shynyqtyrý jáne sport basqarmasynyń uıymdastyrýymen, jastar men ózge jas sanattaryna qala turǵyndaryn kúndelikti dene shynyqtyrý men sportpen shuǵyldanýǵa qyzyqtyrý, jappaı sport túrleriniń biri fýtboldy alyp shaharda nasıhattaý, sondaı-aq, densaýlyqty nyǵaıtý úshin qoljetimdi ádisti tańdaýǵa kómektesý maqsatynda ótkiziledi.
Eske salsaq, aldyńǵy fýtbol matchtary «Narhoz», AÝES, «Sı Sınhaı», «Han Tengrı» jáne QazUÝ ýnıversıtetteriniń fýtbol alańdarynda ótken. Jalpy, bul jarystarǵa 5 myńnan astam adam qatysqan.
Jeńimpazdar men júldegerler dıplomdar men medaldermen marapattaldy.
«Sporttyq Almaty» qalalyq baǵdarlamasy megapolıstegi sporttyń damýyna jáne belsendi tynyǵýǵa baǵyttalǵan. Joba osy ataýmen aldyńǵy jyly bastalyp, búginde qala turǵyndaryn túrli sporttyq sharalarmen qýantyp keledi.
