Almatyda «Fýtbol esirtkige qarsy» atty aktsııa ótkizildi

Bul sporttyq sharaǵa negizinen qaladaǵy turmysy tómen otbasylardyń, áleýmettik osal toptardyń balalary qatysty.

«Qazir jaz aıy. Jaǵdaıy bar otbasylardyń balalary lagerlerde jáne basqa da demalys oryndarynda demalyp júr. Olar ár túrli mádenı sharalarǵa qatysady. Al áleýmettik osal toptardyń balalary bos ýaqyttaryn kóbinese aýlalarda ótkizetini belgili. Mundaı jaǵdaıda jaǵymsyz ádetterge boı aldyrý qaýpi týyndaıtyny ras. Bizdiń basty maqsatymyz - osy balalardyń bos ýaqyttaryn tıimdi uıymdastyrýǵa kómektesý. Olardyń arasynda salamatty ómir saltyn nasıhattaý. Esirtkiniń zııandylyǵyn túsindirý. Odan aýlaq bolýǵa shaqyrý. Bul úshin biz osy salada eńbek etetin birqatar qoǵamdyq uıymdardyń ókilderin shaqyrdyq», - dedi óz sózinde osy ıgi sharany uıymdastyrýshy Almaty qalasy Almaly aýdandyq ákimdiginiń mádenıet jáne tilderdi damytý bóliminiń bas mamany Aqsuńqar Ábiltaeva.

Bul sharany uıymdastyrýǵa «Qorǵaý» qoǵamdyq qory, Almaty qalasy Salamatty ómir saltyn qalyptastyrý ortalyǵy jáne «Ulttyq medıtsına qaýymdastyǵy» qoǵamdyq birlestigi qoldaý kórsetti.

Qaladaǵy jazǵy sport keshenderiniń birinde ótken bul ıgi sharaǵa qatysqan «SShVSM-Qaırat» fýtbol klýbynyń qaqpashylar boıynsha jattyqtyrýshysy Azat Qurmanov balalarǵa fýtbol óneriniń tarıhyn qyzyqty baıandap, osy bir tanymal sport túriniń qyr-syryn, ádisterin shynaıy túrde kórsetip, balalardy tánti etti. Sońynan osy sharaǵa jınalǵan 60 jýyq balany komandalarǵa bólip, kishigirim fýtbol týrnırin uıymdastyrdy.

Jarys sońynda balalardyń barlyǵyna estelik syılyqtar men fýtboldyq jeıdeler tabys etildi.