Almatyda frankofon áninen baıqaý ótti (FOTO)
ALMATY. QazAqparat - Almatyda QR Tuńǵysh Prezıdenti qorynda frankofon áninen baıqaý ótti.
Mádenı shara osymen 10-jyl qatarynan Qazaqstanda atalyp ótetin Frankofonııa meıramy aıasynda uıymdastyryldy.
Bıylǵy baıqaýdy Qazaqstandaǵy Frantsııa elshiliginiń mádenıet jáne yntymaqtastyq bólimi Frantsýz alıansy jelisi men Qazaqstandyq frantsýz tiliniń oqytýshylary qaýymdastyǵy qoldady.
Qatysýshylar frantsýzdyń Je suis malade t.b. klassıkalyq ánderinen bastap, zamanaýı ánderdi oryndady.
Frantsııa elshiliginiń mádenıet salasyndaǵy mamandarynan qurylǵan qazylar alqasy Ásem Abdyqasymovany jeńimpaz dep tanydy. Boıjetken Frantsııaǵa joldama utyp aldy. Frantsýz tilin úırenip júrgender arasynda Nálibaeva Laýra jeńimpaz atandy.
Aıta ketý kerek, frankofonııa meıramy frantsýz tilinde sóıleıtin adamdar arasynda álemniń 77 elinde toılanady. Olar frantsýz mádenıeti men ónerine qurmet kórsetedi. 2008 jyly bul baıqaý Qazaqstanda ulttyq statýs alyp, Astana, Qaraǵandy, Almaty, Qostanaı, Shymkent, Óskemen qalalarynda ótip keledi.
