Almatyda frantsııalyq fotograf erekshe balalarǵa sýret túsirýdi úıretti
ALMATY.QazAqparat - Almatyda Frantsııa fotosýretshisi Erık Vazzolerdiń sheberlik sabaǵy ótti. Sheber Daýn sındromymen aýyratyn balalardy foto ónerine baýlydy. Bul týraly QR Tuńǵysh Prezıdenti - Elbasy qorynyń baspasózi qyzmeti málim etti, dep habarlaıdy QazAqparat tilshisi.
Áıgili sheberden dáris alýǵa «Keńes» ońaltý ortalyǵynyń 10 tárbıelenýshisi múmkindik aldy. Sharaǵa uıytqy bolyp otyrǵan QR Tuńǵysh Prezıdenti qory árbir balaǵa fotoapparat syıǵa tartty.
«Mende erekshe balalardy oqytatyn arnaıy ádis-tásil joq. Ózimniń 30 jyldyq shyǵarmashylyǵymda Frantsııa, Germanııa, Polsha elderiniń jastarymen tájirıbemmen bólistim. Byltyr Qordyń qoldaýymen Qaraǵandy men Almatydaǵy kózi nashar kóretin jáne kórmeıtin balalarǵa arnap sheberlik sabaǵyn ótkizdim», - dedi Erık Vazzoller.
Fotosýretshi árbir sabaǵyn erekshe ári belsendi túrde ótkizýge tyrysady. Munda balalar tek synyp ishinde ǵana emes, sondaı-aq dalaǵa shyǵyp, saıabaqta serýendeý arqyly ádemi kadrlardy túsiredi. Sheberlik sabaǵy aıaqtalǵan soń qatysýshylarǵa «Qazaqstannyń kóztartar aımaqtaryna saıahat» kitaby taratyldy. Endi az ýaqyttan soń jas fotosýretshiler óz kórmelerin ótkizetin bolady.
Áleýmettik mańyzy bar shara Tuńǵysh Prezıdent qory, Qazaqstandaǵy Frantsııa elshiligi jáne Frantsýz alıansynyń qoldaýymen uıymdastyrylyp otyr. Shara barysynda Almatydaǵy Frantsýz alıansynyń dırektory Lor dıý Teıe men QR Tuńǵysh Prezıdenti - Elbasynyń qory ókildiginiń dırektory Sergeı Tohtarov kezdesti.
«Balalarǵa Erık Vazzollerdiń sabaǵy unady, olar bar yntasymen úırenýde. Bular óte elgezek, jańa bilimge qushtar balalar. Bul jobanyń negizgi maqsaty - balalardy foto ónerge baýlý. Olardyń kúndelikti ómir tirshiligin fotosýret arqyly jetkizýlerine múmkindik jasaý. Osynyń arqasynda olardyń kommýnıkatıvtik daǵdylary oıanyp, qorshaǵan ortaǵa ońaı beıimdele alady», - dedi Sergeı Tohtarov.
