Almatyda fortepıanodan mýzykalyq kolledj oqýshylary arasynda tuńǵysh ret Respýblıkalyq ashyq baıqaý bastaldy
ALMATY. QazAqparat - Búgin Almatyda mindetti fortepıano kýrsy boıynsha mýzykalyq kolledjderdiń ár túrli mamandyq boıynsha oqıtyn oqýshylary arasynda tuńǵysh ret Respýblıkalyq ashyq baıqaý bastaldy.
P. Chaıkovskıı atyndaǵy mýzykalyq kolledjiniń sahnasynda ótip jatqan óner saıysyna elimizdiń 11 qalasynan: Astana, Almaty, Aqtaý, Qaraǵandy, Qyzylorda, Shymkent, Semeı, Aqtóbe, Pavlodar, Petropavl jáne Taldyqorǵan qalalarynan 83 oqýshy qatysýda.
«Baıqaýdyń maqsaty - oqýshylarymyzdyń fortepıanoǵa degen qyzyǵýshylyǵyn arttyrý. Baıqaýǵa qatysýshylar ádil túrde eki topqa bólindi. Birinshi topqa mýzykalyq kolledjge mýzyka mektepterin bitirip túskender toptastyrylsa, ekinshi topqa mýzykalyq kolledjge eshqandaı mýzykalyq daıyndyqsyz túskender jınaldy. Baıqaýdyń ereksheligi de osynda. Negizi, mýzykalyq kolledj oqýshylarynyń basym bóligi oqýǵa kezinde mýzykalyq daıyndyqsyz túskender», - dedi óz sózinde P. Chaıkovskıı atyndaǵy mýzykalyq kolledjiniń mindetti fortepıano boıynsha pándik-tsıkldik komıssııa tóraıymy Gúlmıra Muqysheva.
Sonymen qatar, ol qatysýshylar arasynda bir týr ǵana uıymdastyrylatyndyǵyn jetkizdi.
«Bul baıqaý elimizdiń ataqty kompozıtorlary: Ahmet Jubanov, Evgenıı Brýsılovskıı jáne Latıf Hamıdıdiń 110 jyldyǵyn merekeleýge baǵyshtalyp otyr. Sondyqtan baıqaýǵa qatysýshylar osy jáne basqa da otandyq kompozıtorlardyń jáne shet eldik kompozıtorlardyń shyǵarmalaryn oryndaıdy», - dedi G. Muqysheva.
Aıta ketelik, baıqaýǵa tórt mamandyq: mýzyka teorııasy, horǵa dırıjerlik etý, akademııalyq vokal, estradalyq vokal jáne dástúrli vokal boıynsha bilim alatyn oqýshylar qatysyp jatyr. Búgin birinshi toptyń músheleri, al erteń ekinshi toptyń músheleri baqtaryn synaıdy.
Qazylar alqasynyń quramynda belgili oryndaýshylar men oqytýshylar bar. Al tóraıymy - Qurmanǵazy atyndaǵy Qazaq ulttyq konservatorııasynyń halyq aspaptary fakýlteti janyndaǵy fortepıano sektsııasynyń meńgerýshisi, mádenıet salasynyń úzdigi, dotsent Aıgúl Mustafaeva.
Baıqaýdyń saltanatty jabylý rásimi 14 naýryzda osy kolledjiń sahnasynda bolady.
Baıqaý jeńimpazdaryna maqtaý gramotalary, dıplomdar jáne baǵaly syılyqtar tabys etiledi.
Baıqaýǵa QR Tuńǵysh Prezıdenti - Elbasy qory tikeleı qoldaý kórsetip otyr.
