Almatyda Fırýza Sháripova, Erkebulan Toqtar, Ádil Boranbaevtyń qatysýymen jekpe-jek týrnıri ótedi
ALMATY. QazAqparat – Búgin, 29 sáýir keshinde Almatyda Octagon 44 aralas jekpe-jek týrnıri ótedi, dep habarlaıdy QazAqparat Sports.kz portalyna silteme jasap.
Keshtiń negizgi jekpe-jeginde qazaqstandyq faıter Ádil Boranbaev (21-9-1) Bahreın ókili Magomed Magomedovpen (11-0) aıqasady.
Jeńimpaz jartylaı orta salmaqtaǵy Octagon chempıondar lıgasynyń tıtýlyn ıelenedi.
Sondaı-aq kásipqoı MMA-daǵy 5-2 rekord ıesi, qazaqstandyq akter Erkebulan Toqtar «Iran jolbarysy» degen laqap atpen tanymal ırandyq Mohammed Reza Naserıge (4-3-1) qarsy shyǵady.
Tordaǵy alańǵa qazaqstandyq boksshy Fırýza Sháripova da shyǵady (MMA-daǵy rekordy 2-0).
Onyń qarsylasy – reseılik Ilona Bondarenko (0-1).
Jalpy Almatydaǵy Octagon 44 týrnıriniń faıtkardynda 16 aıqas ótedi dep josparlanǵan.
Tikeleı translıatsııa tómendegi YouTube arnada saǵat 18.00-de bastalady.
