Almatyda fılologııalyq bilim berýdiń máseleleri týraly respýblıkalyq ǵylymı-tájirıbelik konferentsııa bolady
ALMATY. 13 sáýir. QazAqparat - Almatyda 17 sáýirde «Fılologııalyq bilim: problemalary men bolashaǵy» degen taqyrypta respýblıkalyq ǵylymı-tájirıbelik konferentsııa ótedi.
Ony Abaı atyndaǵy Qazaq ulttyq pedagogıkalyq ýnıversıteti QR UǴA-nyń akademıgi, fılologııa ǵylymdarynyń doktory, professor Serik Qırabaevtyń 85 jasqa tolýyna oraı uıymdastyryp otyr. Oǵan elimizdiń barlyq joǵary oqý oryndary men ǵylymı mekemeleriniń fılologtary, ádebıetshileri, jazýshylary jáne ózge de zertteýshi ǵalymdary qatyspaq.
Serik Smaıyluly ádebıettaný salasynda 1948 jyldan beri qajymaı-talmaı eńbek etip, 800-den astam ǵylymı maqalalar men eńbekter jarııalady. Oqýlyqtary, oqý quraldary mektepter men joǵary oqý oryndarynda úzbeı oqytylyp keledi. 1957 jyly Spandııar Kóbeevtiń jazýshylyq joly jaıyna kandıdattyq dıssertatsııa, al 1964 jyly Sáken Seıfýllın shyǵarmashylyǵy týraly doktorlyq dıssertatsııa qorǵaǵan ol QR Ulttyq ǵylym akademııasynyń akademıgi dárejesine deıin kóterilip, búgingi tańda qazaq ádebıettaný ǵylymynyń aqsaqalyna aınalyp otyr. Eren eńbegi úshin 1968 jyly KSRO Pedagogıka ǵylymdary akademııasynyń korrespondent múshesi, 1967 jáne 1995 jyldary Qazaqstan men Qyrǵyzstannyń ǵylymǵa eńbek sińirgen qaıratkeri atandy.
