Almatyda «Fenılketonýrııany emdeýdegi zamanaýı ádister» degen taqyrypta sheberlik dáris ótip jatyr
ALMATY. 28 qazan. QazAqparat /Názıra Eleýhan/ - Almatyda QR Densaýlyq saqtaý mınıstrligi Akýsherııa, gınekologııa jáne perınatologııa ǵylymı-zerteý ortalyǵynyń Respýblıkalyq medıtsınalyq genetıkalyq keńesiniń uıymdastyrýymen, atalmysh mekemeniń májilis zalynda «Fenılketonýrııany emdeýdegi zamanaýı ádister» degen taqyrypta sheberlik dárister ótip jatyr.
Oǵan eldiń barlyq aımaqtarynan kelgen fenılketonýrııamen naýqas balalardyń ata- analary, genetık-dárigerler jáne Reseı Federatsııasynan kelgen FKÝ dıetoterapııasy boıynsha jetekshi mamandar men qoǵamdyq uıymdar qatysýda.
Sheberlik synyp barysynda respýblıkadaǵy medıtsınalyq genetıka qyzmetiniń jaǵdaıy, respýblıkanyń barlyq aımaqtarynda júrgiziletin jańa týǵan nárestelerdiń neonataldy skrınıgi memlekettik baǵdarlamasy nátıjeleri, FKÝ dıagnostıkasy men eminiń zamanaýı múmkindikteri jaıly baıandamalar oqylyp, osy salaǵa qatysty ózekti máseleler talqylanatyn bolady. Bunymen qatar, tájirıbelik sabaqtar aıasynda respýblıkanyń barlyq aımaqtarynan kelgen fenılketonýrııamen naýqas balalardyń ata-analaryna, genetık-dárigerlerimen FKÝ kezindegi emdik tamaqtaný túzetýleri men esepteý ádisteri oqytylatyn bolady.
Uıymdastyrýshylardyń aıtýynsha, bul master-klass fenılketonýrııany emdeýdegi jalǵyz patogenetıkalyq ádis bolyp tabylatyn dıetoterapııanyń tıimdiligin arttyrý máselesine arnalǵan.
"Alǵash ret sheberlik synyp eldiń barlyq aımaqtarynan kelgen fenılketonýrııamen naýqas balalardyń ata-analaryn, genetık-dárigerlerdi jáne Reseı Federatsııasynan kelgen FKÝ dıetoterapııasy boıynsha jetekshi mamandar men qoǵamdyq uıymdardy biriktirip otyr. Bul dáristerdiń Qazaqstan Respýblıkasynda fenılketonýrııany emdeý nátıjeliligin arttyrý men bala ólimi jáne múgedektikti tómendetý úshin dıagnostıkalaýǵa zamanaýı ádisterdi engizýdiń mańyzy zor. Óıtkeni, erte anyqtaý emdi der kezinde bastaýǵa jáne osy syrqattardyń múgedektikke alyp keletin saldarynyń (aqyl - oı damýy kemistiginiń) aldyn alýǵa múmkindik beredi",-dep atap ótti Respýblıkalyq medıtsınalyq genetıkalyq keńesiniń meńgerýshisi, medıtsına ǵylymdarynyń doktory, professor Gúlnar Svıatova.
Onyń aıtýynsha, búginde jańa týǵan nárestelerdi genetıkalyq skrınıgpen qamtý 2007 jylǵy 31% kórsetkishten 2011 jyldyń ótken 9 aıynda 75%-ǵa ósken (jańa týǵan nárestelerdiń jalpy sanynan). "Osy jyldyń ótken 9 aıy ishinde ǵana fenılketonýrııamen syrqattanǵan 10 bala jáne týa bitken gıpotıreozben naýqas 25 bala anyqtaldy. Qazirgi ýaqytta fenılketonýrııadan zardap shegetin 66 bala oblystyq (aımaqtyq) medıtsınalyq-genetıkalyq keńesterdiń dıspanserlik tirkeýinde tur. Al, genetıkalyq skrınıng baǵdarlamasy boıynsha syrqaty der kezinde anyqtalǵan jáne qajetti emdeý sharalarynyń óz ýaqytynda bastalýy nátıjesinde qazirgi tańda aýrýdyń múgedektikke ákelýshi klınıkalyq belgilerinsiz ósip kele jatqan fenılketonýrııamen naýqas 30 bala dıspanserlik esepte tur",-dedi ol.
