Almatyda feldsherdi sabaǵan adam qamaýǵa alyndy
ALMATY. QazAqparat – Almatyda medıtsınalyq kómek kórsetýge kelgen feldsherdi urǵan adam ustaldy, dep habarlaıdy QazAqparat tilshisi.
Jedel járdem qyzmetine terezeni syndyryp qolyn kesip alǵan mas adamǵa kómek kerek degen habarlama kelgen.
Oqıǵa ornyna jetken feldsher Aqkent shaǵynaýdanynyń 35jastaǵy turǵynynyń qolyn qarap jatqanda er adam ashýlanyp ony betinen urǵan.
Buzaqy QR ÁqbK 73-babynyń 1-bólimimen ákimshilik jaýapkershilikke tartyldy.
Búgin aýdanaralyq ákimshilik sot ony 5 táýlikke qamaý týraly úkim shyǵardy.
Qazir Túrksib aýdany sotynda osyǵan uqsas is qaralyp jatyr.
Munda da mas adam kómek kórsetýge kelgen medıtsınalyq qyzmetkerdi soqqyǵa jyqqan.
Basynan jaraqat alǵan dáriger aýrýhanaǵa jatqyzyldy.
