Almatyda farkompanııanyń menedjerin pyshaqtaǵan qaraqshylar ustaldy
ALMATY. QazAqparat – Almatylyq polıtseıler dári-dármek satatyn fırma menedjerine qaraqshylyq shabýyl jasaǵan eki er adamdy ustady, dep habarlaıdy QazAqparat tilshisi.
«5 tamyz kúni tústen keıin, 29 jáne 22 jastaǵy eki adam keńse meńgerýshisine qaraqshylyq shabýyl jasady. Olar elektroshoker men pyshaqty qoldaný arqyly jábirlenýshiniń sómkesin qoldy etken. Onda 500 myń teńge, uıaly telefon, ámııan men kózildirik bolǵan. Farmatsevt kompanııasynyń qyzmetkeri qaraqshylarǵa qarsylyq bildirgen. Saldarynan pyshaq jaraqatyn alǵan. Urylar jábirlenýshiniń qolyn telefon kabelimen baılap, tastap ketken. Oqıǵa ornyna jetken jedel-tergeý toby ony aýrýhanaǵa jetkizdi. Oǵan «sol jaq jańbasynyń suǵylyp-kesilgen jaraqaty, bel aımaǵynyń tereń tımegen suǵylyp-kesilgen jaraqaty» dıagnozy qoıyldy», - dedi Almaly aýdandyq polıtsııa basqarmasy bastyǵynyń orynbasary Abzal Turǵanaly.
Tergeýshiler kúdiktilerdiń qashqan jolyn birden anyqtap, olar otyrǵan taksıdi tapty.
«Jedel izdestirý sharalary nátıjıesinde kúdiktiler ustalyp, qamaýǵa alyndy. Olar Almaty jáne Jambyl oblystarynyń týmalary, 1990 jáne 1997 jylǵy azamattar. Sotqa deıingi tergeý barysynda qaskóılerdiń jasaǵan qylmysynyń mán-jaıy anyqtalyp, olardyń basqa da zańsyz áreketterge qatysynyń bar-joǵy tekseriletin bolady», - dedi podpolkovnık Abzal Turǵanaly.
