Almatyda «Farıza» spektakliniń premerasy bolady
ALMATY. QazAqparat- Qyrkúıektiń 5-6 kúni M.Áýezov atyndaǵy Qazaq memlekettik akademııalyq drama teatrynda «FARIZA» spektakliniń premerasy qoıylady, dep habarlaıdy QazAqparat tilshisi.
Shynshyl da syrshyl óleńderimen jurttyń júregine jol tapqan, adaldyǵy men aqyndyǵy teń túsetin, qaısar da qaıtalanbas talant ıesi - Farıza Ońǵarsynovanyń ómiri men óleńi týraly pesany dramatýrg Roza Muqanova jazdy.
«Ol aqyn, jazýshy, shyǵarmashylyq adamy retinde barlyq qurmetke laıyq jan. Biz osy qoıylym arqyly jastarǵa, onyń zamandastaryna, aqynyń shyǵarmashylyǵyn jaqsy kóretin adamdarǵa astraldi dúnıe kórsetkimiz keledi. Biz úshin aqyn Farızany ǵana emes, áıeldiń sezimin jetkizý mańyzdy»,-dedi ıdeıa avtory jáne jobanyń bas prodıýseri Aınur Kópbasarova.
Onyń aıtýynsha, pesa qazaq tilinde qoıylady, orys tiline ilespe aýdarma jasalady.
«Qazan aıynda osy spektakldi Resseıdiń úlken sahnasynda qoıamyz. Qazaqtyń Farızasyn qazaqstandyqtar ǵana emes búkil álem tanysa, bilse deımiz. Bizdiń bul bastamamyzdy QR Reseı Federatsııasyndaǵy Tótenshe jáne Ókiletti Elshisi Imanǵalı Nurǵalıuly qoldady, men oǵan rızashylyǵymdy bildirgim keledi », - dep tolyqtyrdy joba avtory.
Basty rólderde «Daryn» memlekettik syılyǵynyń laýreaty Nazgúl Qarabalına, teatr jáne kıno akterleri Qýandyq Qystyqbaev, Leıla Beknazar-Hanınga jáne Erlan Káribaev oınaıdy.
«Maǵan basty keıipkerdiń rólin oınaý týraly usynys naýryz aıynda Aınurdan tústi. Árıne, Farıza apaıdy, onyń shyǵarmashylyǵyn biletinmin. Men ony kórdim, biz bir dastarhan basynda da otyrǵanbyz. Ol kisi tik minezdi bolatyn. Biraq, eshqashan daıys kóterip qatty sóılemeıtin, óte názik jan edi. Ol óz oıyn anyq ári ashyq jetkizetin», - deıdi aktrısa.
Qoıylymnyń rejısseri Farhat Moldaǵalı, spektakldi jumbaq ári mıstıkalyq dep atady, óıtkeni olar aqynnyń ishki álemin kórsetýge tyrysqan.
Spektakldegi arnaıy mýzykalyq kompozıtsııany kompozıtor Renat Gaısın jazdy.
«Ol Farıza Ońǵarsynovany tanıdy, janynda boldy. Sondyqtan bolar, Rınat aqynyń sezimin, tabıǵatyn mýzyka arqyly jetkize bildi. Ol Muqalı Maqataevty kórgen joq. Desekte, bul aqynyń da jan dúnıesin mýzyka arqyly kórsetti. Ol bizdiń zamanymyzdaǵy qazaqtyń eki uly aqynynyń minezin, tabıǵı bolmysyn mýzykanyń kúshimen kórsete bildi»,- deıdi prodıýsser.
Uıymdastyrýshylardyń aıtýynsha, qoıylym basqa formatta kórsetiledi. Zamanaýı tehnologııalyq qurylǵylar kómegimen daıyndalǵan vıdeokontent, dybys arqyly áserleý, obrazǵa saı dekoratsııa, sahna kóńil-kúıine sáıkes arnaıy jazylǵan mýzyka, saýndtrek, ártisterdiń kıim úlgisiniń talǵammen tigilýi. Munyń bári kreatıvti shyǵarmashylyq toptyń kórermenderge daıyndaǵan syıy.
Spektakl 16 jastan asqan kórermenderge arnalǵan. Bıletterdi kassa operatorlarynan jáne teatrdan satyp alýǵa bolady.
