Almatyda Farıza Ońǵarsynovanyń jyr keshi ótti
ALMATY. Qańtardyń 25-i. QazAqparat /Erbol Azanbek/ - Ótken senbi kúni Almatydaǵy Abaı atyndaǵy memlekettik opera jáne balet teatrynda kórnekti aqyn, Memlekettik syılyqtyń ıegeri Farıza Ońǵarsynovanyń «Óleń, men seni aıalap ótem...» atty jyr keshi ótti,
dep habarlaıdy QazAqparat.
Kesh aqyn óleńderine negizdelgen sahnalyq qoıylymmen ashyldy. Sharaǵa QR Mádenıet jáne aqparat mınıstri Muhtar Qul-Muhammed qatysyp, QR Prezıdenti Nursultan Nazarbaevtyń quttyqtaýyn oqydy.
«Qurmetti Farıza Ońǵarysynqyzy, sizdi úlken mereıtoıyńyzben shyn júrekten qutyqtaımyz. Siz ulttyq poezııamyzda ózińizdiń dara daýysyńyzben erte tanylǵan dara talanttardyń birisiz. Názik te shynshyl, ózge de órshil lırıkańyzben birden-aq óleńsúıer qaýymnyń ystyq yqylasyna bólendińiz. Halqyńyz sizdiń oıly da jigerli poezııańyzdan qýat alyp keledi. Siz tamasha jýrnalıst, bilikti basshy retinde elimizdiń damýyna úlken eńbek sińirdińiz. Baqytyńyz baıandy, densaýlyǵyńyz myqty bolsyn. Halqyńyzdy ózińizge degen sheksiz mahabbatyna bólene berińiz», delingen qutyqtaý hatta.
Keshke bunymen qatar QR Jazýshylar odaǵy basqarmasynyń tóraǵasy Nurlan Orazalın, aqynnyń áriptesteri, aqyn-jazýshylar, qoǵam, mádenıet qaıratkerleri qatysyp, jyly lebizderin bildirdi. Bunymen qatar belgili óner juldyzdary aqyn óleńderi arqaý bolǵan ánderdi shyrqady.Kesh barysynda Farıza aqynnyń ózi de sııasy keppegen jańa óleńderin oqydy.
«Men jalpy shyǵarmashylyǵymda qazaq áıeliniń, áıel zatynyń ártúrli jaǵdaıdaǵy kóńil-kúıin kórsetkim keledi. Meni 70 jyldary Almatyda ádebı qaýym qabyldamady. Ashyq aıtady, bul bolmaıdy dep. Men oǵan qysylmadym. Aıtqym kelgenin aıttym», deıdi aqyn.
«Farıza aqynnyń bergeninen bereri kóp. Aqyn esh ýaqytta qartaımaıdy, eseıedi. Shyǵarmashylyq shabyt ústinde áli. Bul kisiniń jigeri, adamı dúnıetanymy, tabıǵı minezi shynaıy. Ol ǵashyqtyqtyń sımvolyna aınalǵan adam. Bundaı aqyn qazaq qyzdarynyń ishinde sanaýly. Bul kisi solardyń biri, biregeıi. Aqyn degen ultynyń beti, tólqujaty sııaqty. Aqyn ulttyń joǵyn joqtap, baryn maqtap, ulaǵatty sóz qaldyrǵan adam bolýy tıis. Farıza álem tanyǵan adam. Sondyqtan búgingi mereıtoıy áserli, ádemi ótti. Halyqtyń aqyn jyrlaryn saǵynyp qalǵany kórinip-aq tur», deıdi M.Áýezov atyndaǵy Memlekettik akademııalyq drama teatrynyń dırektory Esmuhan Obaev.
