Almatyda Farıza Ońǵarsynovaǵa arnalǵan spektakldiń premerasy ótti
ALMATY. QazAqparat - Almatyda Muhtar Áýezov atyndaǵy Qazaq memlekettik drama teatrynda «Farıza» spektakliniń premerasy ótti, dep habarlaıdy QazAqparat «Habar 24» telearnasyna silteme jasap.
Poezııa padıshasy Farıza Ońǵarsynovaǵa arnalǵan qoıylym zamanaýı tehnıkanyń kómegimen sahnalandy. Syrshyl da shynshyl aqynyn saǵynǵan jurt qoıylymnan úlken áser alyp qaıtty.
Ideıa avtory Aınur Kópbasarovanyń aıtýynsha, jyr áleminde ózindik qoltańbasymen erekshelengen aqyndy sahnalaý týraly oı úsh jyl buryn týyndaǵan.
«Farıza Ońǵarsynova qanshalyqty jumbaq adam bolsa bul qoıylymnyń ózi sonshalyqty mıstıkaǵa toly qoıylym. Óıtkeni, Farızanyń jumbaq dúnıesin ashý - bir tylsym kúsh. Ol óz óleńderinde ishki dramasyn tragedııasyn poezııaǵa, poezııasyn fılosofııaǵa aınaldyrǵan dara aqyn», - deıdi ol.
Qoıylymda zamanaýı tehnologııa qoldanylǵan. Sahnada aıtylar oıǵa saı sahnalyq bezendirý men kompozıtor Renat Gaısın jazǵan mýzyka da kópshilik kóńilin dóp basqandaı. Prodıýserlik ortalyqtyń tapsyrysymen pesany dramatýrg Roza Muqanova jazyp shyqqan. Al basty keıipker - Farıza rólin Áýezov teatrynyń aktrısasy Nazgúl Qarabalına oınady.
Qoıylymnyń rejısseri Farhat Moldaǵalıev atap ótkendeı, akterlar keıipkerlerdiń portrettik beınesin emes, ishki jan dúnıesin ashýǵa tyrysqan.
«Spektakldiń eń birinshi ereksheligi, bul Qazaqstanda bolmaǵan jaǵdaı - bes teatrdyń basyn qurap otyrǵan spektakl. Bul jerde jańa tehnologııalardy qoldanyp, jańa, basqasha dybys shyǵaratyn tehnıkalyq jaǵynan da óte jaqsy jabdyqtalǵan spektakl», - deıdi Farhat Moldaǵalıev.
Spektakl alǵashqy qoıylymynan-aq kórermenniń kóńilinen shyqty. «Farıza» endi qazan aıynda Máskeýde sahnalanady.
