Almatyda ezoterııalyq ádebıet baspasy ashylady

dep habarlaıdy QazAqparat.

«Táýelsiz basylymdar redaktorlarynyń qaýymdastyǵy» qoǵamdyq birlestiginiń prezıdenti Jangeldi Estenbaevtyń aıtýynsha, bul jobany «Jan» jáne «Arys» baspalary birlesip qolǵa alyp otyr.

«Sońǵy málimetterge qaraǵanda, elimizde 800-den astam baspa uıymdary men 700-ge jýyq polıgrafııa kásiporyndary jumys isteıdi eken. Olardyń 80 paıyzy kórkem ádebıet shyǵarsa, qalǵan bóligi túrli sala, taqyryptardaǵy kitaptardy basyp shyǵarady. Alaıda kitap naryǵynda Reseılik baspa ónimderiniń basym túsip jatqany jasyryn emes. Óıtkeni qazaq tilindegi tanymdyq dúnıelerdi bir izge salý, júıeleý joq» deıdi Jangeldi Estenbaev. Onyń aıtýynsha, jańa baspa osy olqylyqtyń ornyn toltyryp, adam janynyń qupııa-syrlaryna tereń úńilý, okkýlttik ǵylymdardyń, shyǵys ilimderiniń, qazaqtyń nanym-senimderiniń túp negizderin jaryqqa shyǵarmaq. Bul rette aldaǵy ýaqytta «Tylsym dúnıe», «Qazaqtyń yrymdary» serııalarymen kitaptar jaryq kóretin bolady. Sondaı-aq aldaǵy ýaqytta baspa janynan ǵylymı-zertteý ortalyǵy da ashylmaq.