Almatyda eýropalyq talaptarǵa saı tramvaılar júrgiziledi

Bul týraly búgin baspasóz máslıhatynda Almaty qalalyq tramvaı deposynyń bastyǵy Ábdibek Muhamedjanov aıtty.

Onyń sózine qaraǵanda, qazirgi kezde Almatynyń tramvaı kóligin damytýdyń 3 kezeńdi baǵdarlamasy jasalǵan. 39 aıda júzege asýy tıis dep josparlanǵan jobanyń alǵashqy kezeńinde Aqsaı-Jetisý kóshesi baǵytyndaǵy 4-shi tramvaı joly tolyqtaı aýystyrylyp, eýropalyq talaptarǵa sáıkestendiriledi. Sondaı-aq árqaısysynyń quny 2,5 mıllıon eýrolyq 24-30 metrlik jańa 24 vagon satyp alynady. 1-shi kezeńniń jalpy quny 189,4 mıllıon eýrony quraıdy. 2-shi kezeńde 6-shy baǵyttyń joly aýystyrylyp, jańa vagondar iske qosylmaq. Úshinshi sheshýshi kezeńde shaǵyn qalalyq poıyzdar Almatyny Qaskeleń, Talǵar baǵyttarymen jalǵaıtyn bolady. «Jalpy joba aıasynda 100 jańa tramvaı satyp alynyp, tramvaı deposy salynady» deıdi Á.Muhamedjanov. Onyń aıtýynsha, bul jobany júzege asyrý úshin qazirgi kezde ınvestorlar izdestirilýde.

«Eger keler jylǵa deıin ınvestor máselesi sheshilse, 1-shi kezeń boıynsha jumystardy bastap ketemiz. Buǵan sheteldik kompanııalardyń usynystary bar. Tehnıkalyq-ekonomıkalyq negizdemesi jasalýda. Jaqynda arnaıy qoǵamdyq tyńdaý ótkizilip, ákimdik pen qala turǵyndary tarapynan qyzý qoldaýǵa ıe boldy. Óıtkeni bul bizdiń qala úshin óte qajet. Qazirgi tramvaı jelileri ábden tozǵan. Máselen, paıdalanatyn vagondardyń barlyǵy buryn Germanııada qoldanysta bolǵan. Eger joba júzege assa, osy máseleniń barlyǵy sheshilip, ýaqyt pen energııa únemdeledi. Mysaly, qazir 4-shi baǵyttaǵy tramvaılar Aqsaıdan Jetisýge deıin 1 saǵatta júrip ótse, joba júzege asqan soń 34 mınýtta mejege jetedi. Bunymen ońtústik astanamyzdy eýropalyq standarttarǵa jaqyndatamyz. Jalpy toqpen júretin kólikterdi damytý kún tártibindegi másele. Óıtkeni, qalanyń ekologııalyq ahýalyn sheshýge birden-bir qajet», deıdi Almaty qalalyq tramvaı deposynyń bastyǵy.