Almatyda Eýro-5 standartyndaǵy 50 jańa avtobýs jolǵa shyǵady
ALMATY. QazAqparat - Almatyda kólik baǵyttary boıynsha Eýro-5 standartyndaǵy 50 jańa avtobýstar júre bastaıdy, dep habarlaıdy QazAqparat tilshisi.
Almatyda qoǵamdyq kóliktiń jyljymaly quramyn jańartý jumystary jalǵasýda. Megapolıs ákimi Baýyrjan Baıbek tasymaldaýshy «Green bus company» JShS satyp alǵan jańa avtobýstardy qarap shyqty. Almatynyń Kólik holdıngi ortalyq dıspetcherlik basqarmasynyń málimeti boıynsha qyrkúıek aıynda №50,112,126 baǵyttaryndaǵy kóliktiń qatynaý jıiligi 56%, 24% ı 56% -dy quraǵan, sonyń saldarynan turǵyndardan shaǵymdar da kóp túsken. Osyǵan oraı, Yutong markaly 50 jańa avtobýs atalǵan baǵyttardaǵy olqylyqtardyń ornyn toltyratyn bolady. Al bosaǵan avtobýstar №120,135,63,118,38,45,18,92,30,32 baǵyttary boıynsha bólinedi.
Almaty qalasy Jolaýshylar kóligi jáne avtomobıl joldary basqarmasynyń basshysy Maqsut Isahov «Almatyelektrotrans» JShS bıylǵy jyldyń qazanynan jeltoqsanǵa deıin 297 avtobýs satyp alýdy josparlap otyrǵandyǵyn jetkizdi. Qazirdiń ózinde «LIAZ» markaly 20 avtobýs jetkizildi, 13 qazanda Máskeýden 20 avtobýs jolǵa shyqqan, taǵy 20 avtobýs 16 qazanda keledi, qalǵandary kezeń boıynsha tasymaldanady. Barlyq avtobýstar kondıtsıonerlermen jabdyqtalǵan, qalanyń brenbýki boıynsha bir stılde árlenedi.
Bulardan ózge, jeke tasymaldaýshylar 254 avtobýs alýdy josparlaýda, olardyń 60-ynyń syıymdylyǵy ortasha, qalǵan 194-i úlken. Tasymaldaýshy kompanııalar «BaTý trevel» JShS, «AvtoAlma-Trans» JShS, «Madına» JShS, «Talap T»JShS, «Samat Trans» JShS, «Green bus company» JShS-niń jańa avtobýstary bıylǵy jyldyń qazan aıynan 2018 jyldyń sáýir aıyna deıin kele bastaıdy.
Aıta keterligi, «Almaty-2020» qalalyq damý baǵdarlamasynyń basty qaǵıdalarynyń biri - qoǵamdyq kólikti reformalaý, sonyń barysynda kólikter jańarýda.
Atalǵan baǵdarlamada Qoǵamdyq kólikti damytý joldardaǵy keptelisterdi azaıtýǵa, qalalyqtardyń ýaqytyn jáne kólikke, ınfraqurylymǵa arnalǵan shyǵyndardy únemdeýge ákeledi. 2020 jyly qoǵamdyq kóliktiń úles salmaǵy 32 %-dan 50 %-ǵa deıin ósetini ol úshin birinshi kezekte jeke kólikpen salystyrǵanda qoǵamdyq kóliktiń tartymdylyǵyn arttyrý qajet ekeni aıtylǵan.
«Damyǵan elderdiń tájirıbesine sáıkes yntalandyrý sharalary qoldanylady (aıryqsha avtobýs jolaqtarynyń sanyn kóbeıtý, seriktes qalalar men kólik qatynasyn uıymdastyrý, metrony damytý jáne t.b.) jáne shekteý sharalary (aqyly turaqtar engizý, teńgermeli tarıfter jáne t.b.)», -delingen bolatyn baǵdarlamada.
