Almatyda Eýrazııalyq úkimetaralyq keńestiń otyrysy bastaldy

ALMATY. QazAqparat - Almatyda Eýrazııalyq ekonomıkalyq odaq (EAEO) elderi úkimet basshylarynyń qatysýymen Eýrazııalyq úkimetaralyq keńestiń otyrysy bastaldy, dep habarlaıdy QazAqparat tilshisi.

Sharaǵa Armenııa, Belarýs, Qazaqstan, Qyrǵyz, Reseı, Moldova úkimetiniń basshylary men Eýrazııalyq ekonomıkalyq komıssııa alqasynyń tóraǵasy qatysýda.

EAEO otyrysy shaǵyn jáne keńeıtilgen quramda ótip jatyr. Kún tártibine 12 suraqty talqylaý qarastyrylǵan. Onyń qatarynda saýda-ekonomıkalyq áriptestik, múshe memleketter arasynda ózara taýar almasýdy keńeıtý, kedergilerdi alyp tastaý, sonymen qatar ekonomıkanyń keıbir salalarynda ıntegratsııalyq áleýetti damytý máseleleri bar.

Sonymen qatar, Eýrazııalyq keńistiktegi ulttyq valıýtalardy paıdalanýdy keńeıtý jáne kópjaqty ıntegratsııalyq birlestikterdiń tájirıbesin eskere otyryp, qorǵanys sharalaryn qoldanýdy jetildirý boıynsha birqatar bastamalardy talqylaý josparlanǵan.