Almatyda «Eýrazııa» halyqaralyq kınofestıvali bastaldy (FOTO)
ALMATY. QazAqparat - Almatyda H Halyqaralyq «Eýrazııa» kınfestıvali bastaldy. Respýblıka saraıynda ótken onyń ashylý saltanatyna qazaqstandyq jáne reseılik kınematograf juldyzdary qatysty.
Olardyń arasynda Asanáli Áshimov, Jan Baıjanbaev, Janna Qýanysheva, Ásel Saǵatova, Asylhan Tólepov, Azız Beıshenalıev, Berik Aıtjanov, Valerıı Nıkolaev, Marııa Berseneva, Anastasııa Melnıkova, Janna Epple, Olga Dyhovıchnaıa, Sergeı Anashkın, Tszıa Djanke, Lı Chhan Don boldy.
«Eýrazııa» HKF dırektory, «Qazaqfılm» AQ prezıdenti Ermek Amanshaev basty nagradany kınony damytý isine qosqan úlesi úshin reseılik jáne keńestik kınorejısser Sergeı Solovevqa tapsyrdy. Rejısser músinsheni qazaqstandyq voleıboldyń jarqyn juldyzdarynyń biri Sábına Altynbekovanyń qolynan aldy.
Resmı saltanattan keıin kórermenderge qazaq rejısseri Sháken Aımanovtyń «Atameken» fılmi kórsetildi.
Eske sala keteıik, «Eýrazııa» HKF Almatyda 15-20 qyrkúıek aralyǵynda ótedi.
Konkýrstyq baǵdarlamaǵa bıyl 12 kartına engizildi. Bular - «Tymyq sý beti» (Japonııa), «Tastaǵy estelik» (Irak), «Aýyr kún» (Ońtústik Koreıa), «Onymen birge» (Izraıl), «Mandarınder» (Estonııa), «Bota» (Albanııa), «Jylqylar jáne adamdar týraly» (Islandııa), «Juldyz» (Reseı), «Tanysýdy uıymdastyrýshy áıel» (Frantsııa), «Kovboı» (Horvatııa), «Tynysh... qyzdar jylamaıdy» (Iran), «Dala daýysy» (Qazaqstan).
Bıylǵy jyly festıval qazaq rejısseri Sháken Aımanovtyń júz jyldyǵyn merekeleý uranymen ótýde. Baǵdarlama aıasynda «Jambyl», «Bizdiń súıikti dáriger», «Taqııaly perishte», «Atamannyń aqyry» fılmderi tegin kórsetiledi.
