Almatyda EýrAzEQ elderindegi damý máseleleri týraly konferentsııa ótti
ALMATY. 9 jeltoqsan. QazAqparat /Erlik Erjanuly/ - Búgin Almatyda Dúnıjúzilik bank pen Eýrazııa damý banki sarapshylary EýrAzEQ-qa múshe-memleketterdiń ekonomıkalyq damý keleshegi men máseleleri týraly birlesken alǵashqy ǵylymı-tájirıbelik konferentsııasyn ótkizdi.
Onda ǵalamdyq ekonomıkalyq úderisterdiń EýrAzEQ elderine áseri, yqpaldastyq aǵymdary men aımaqtaǵy kóshi-qon jáne jumyspen qamtý máseleleri basty nazarda boldy.
«Konferentsııa eki damý ınstıtýtynyń 2011 jylǵy jumysyn qorytyndylap, 2012 jylǵy yntymaqtastyq josparyn belgiledi. Dúnıejúzilik bank ǵalamdyq damý ınstıtýty bolsa, Eýrazııa damý banki - jyldam damyp kele jatqan aımaqtyq qarjy ınstıtýty", - deıdi Eýrazııa damý bankiniń (EDB) Basqarma tóraǵasynyń orynbasary Sergeı Shatov.
Jalpy bul shara Dúnıejúzilik bank pen Eýrazııa damý bankiniń arasyndaǵy 2011-2013 jyldardaǵy yntymaqtastyq týraly kelisim aıasyndaǵy jospardy júzege asyrýǵa sáıkes uıymdastyrylyp otyr. Eki taraptyń arasynda qazan aıynda qol qoıylǵan bul kelisimde 4 baǵyttaǵy sharalar jospary qamtylǵan bolatyn. Olar - Eýrazııa damý bankine qatysýshy-memleketterdegi ekonomıkalyq ahýaldy boljaý jáne taldaý barysyndaǵy úılestirý. Aıtarlyqtaı daǵdarysqa qarsy áleýeti bar jobalardy, ásirese ınfraqurylym men energetıka salasyndaǵy birlesip ázirleý men júzege asyrý. Saýda, ınvestıtsııa jáne eńbek resýrstary kóshi-qony salalaryndaǵy aımaqtyq yntymaqtastyqty qoldaý. EýrAzEQ-tyń Daǵdarysqa qarsy qorynyń áleýetin nyǵaıtý. Makroekonomıkalyq monıtorıng jáne modeldeý, eldiń qaryzdyq turaqtylyǵyn taldaý, memlekettik qarjyny basqarý, jobalardy baǵalaý jáne monıtorıng, satyp alýdy júrgizý ádisteri men tártibi, tabıǵatty qorǵaý salasyndaǵy strategııalyq sharalar jáne jobalardy júzege asyrýda halyqty áleýmettik qorǵaý sharalary.
