Almatyda etnofestıval: Myńdaǵan adam jınaldy
ALMATY. QazAqparat - Almatyda Boraldaı saq qorǵandarynda dástúrli etnofestıval ótip jatyr, dep habarlaıdy QazAqparat tilshisi.
Alataýdyń baýraıyndaǵy «Boraldaı saq qorǵandary» arheologııalyq parkinde «Uly dala - kóshpendiler álemi» etnofestıvalinde álemniń 18 elinen 140 adam keldi.
Etnofestıvaldi tamashalaýǵa kelgen týrısterge arnap etnoaýyl, ulttyq sporttyq oıyndar, sadaqshylar, qolónershiler, ustalar, búrkitshiler, ańshylarǵa arnaıy alańdar tigildi.
Sondaı-aq, kelýshilerge ulttyq taǵam qoıylǵan dastarhan jaıyldy.
Kóshpendiler merekesine Majarstan, Ázerbaıjan, Mońǵolııa, Ýkraına, Býrıatııa, Saha Respýblıkasynan, Daǵystannan adamdar keldi.
Uıymdastyrýshylar 7-8 maýsym aralyǵynda on myńdaı adamdy kútip alýǵa ázir ekendikterin jetkizdi.
Antropolog Andrash Bıro bastaǵan Majarstannan kelgen etnotýrıster at oıyndaryna belsene qatysty. Bashqurtstannan kelgen sadaqshylar at ústinde ári jaıaý mergendik qabiletterin synady.
Almaty ákimi Baýyrjan Baıbek te sadaq atyp kórdi. Qyrǵyz elinen kelgen «Salbýýrýn» komandasy atbegilik, qusbegilik, ańshylyq qasıetterin kórsetetin boldy.
«Etnofestıvalde kóshpendiler zamanyndaǵy mýzyka men sporttyq saıystar saltanat qurmaq. Basty maqsat - kóshpendiler zamanynyń tarıhyn óskeleń urpaqtyń sanasyna sińirý», - dedi qalalyq Mádenıet basqarmasynyń basshysy Nurlan Sydyqov.
Etnofestıval aıasynda zamanaýı óner kórmeleri, «Turan» etnofolklorlyq ansambli, «Hassaq» ujymy, Túrkııa, Mońǵolııa, Altaı, Tyva, Chývashııa, Qyrǵyz elinen kelgen ánshiler óner kórsetedi.
Sonymen qatar, alyptar shoýy josparlanǵan. Qazaqstannyń 7 dúrkin chempıony, álemniń 2 dúrkin chempıony, Gınnestiń rekordtar kitabyna engen Sergeı Tsyrýlnıkov bastaǵan kúshtiler óner kórsetedi.
Kelýshilerge yńǵaıly bolý úshin qalanyń 4 jerinen Abaı men A.Baıtursynov qıylysynan, Shalıapın kóshesindegi 22 úıdiń janynan, Alataý dástúrli óner teatrynan, Almaty-1 temirjol vokzalynan arnaıy avtobýstar shyǵaryldy. Boraldaı saq qorǵandaryna jetý quny - 150 teńge.
