Almatyda Esmuqan Obaevtyń 70 jasqa tolǵan mereıtoıy atalyp ótti
MATY. 24 qazan. QazAqparat /Názıra Eleýhan/ - Almatyda senbi kúni, Qazaqtyń memlekettik Muhtar Áýezov atyndaǵy akademııalyq drama teatrynda Qazaqstannyń eńbek sińirgen óner qaıratkeri, Qazaqstannyń halyq artısi,
Memlekettik syılyqtyń ıegeri, táýelsiz «Tarlan» syılyǵynyń laýreaty, «Parasat» ordeniniń ıegeri, Muhtar Áýezov atyndaǵy Qazaq memlekettik akademııalyq drama teatrynyń kórkemdik jetekshisi jáne dırektory Esmuhan Obaevtyń 70 jasqa tolýyna arnalǵan mereıtoılyq kesh bolyp ótti.
Keshke óner, ádebıet, mádenıet, teatr salasynyń qaıratkerleri, zııaly qaýym ókilderi, kórnekti rejısserdiń ómirdegi jáne ónerdegi dostary qatysty.
Sharaǵa arnaıy kelgen QR Mádenıet mınıstri Muhtar Qul-Muhammed óz atynan jáne mınıstrliktiń atynan mereıtoı ıesin quttyqtap, ıyǵyna shapan jaýyp Elbasynyń quttyqtaýyn oqyp berdi. Quttyqtaýda: «Qurmetti Esmuhan Nesipbaıuly! Sizdi 70 jasqa tolǵan mereıtoıyńyzben quttyqtaımyn! Bul aıtýly belesińizdi qazaq mádenıetiniń kórnekti qaıratkeri, ulttyq teatrdyń sheberi, ulaǵatty ustaz retinde qarsy alyp otyrsyz. Sizdiń ómir jolyńyz qazaq sahna óneriniń órken jaıýymen, rýhanı qundylyqtarymyzdyń túlep-túrlenýimen tyǵyz baılanysty. Kemelińizge kelip, shyǵarmashylyq áleýetińiz tolysqan shaqta qazaq sahna óneriniń qara shańyraǵy M.Áýezov atyndaǵy akademııalyq drama teatrynda jetekshilik jasap, onyń shyǵarmashylyq kórkemdik qýatynyń odan ári shyńdalyp, nyǵaıa túsýine eleýli eńbek sińirdińiz. Teatr sahnasynda álemdik jáne qazaq ulttyq klassıkasynyń úzdik úlgilerin, júzden astam qoıylymdy kórermenge usyndyńyz. Mereıtoı sátinde ózińizge myqty densaýlyq, otbasyńyzǵa bereke, shyǵarmashylyq tabystar tileımin», - delingen.
Almaty qalasy ákimi Ahmetjan Esimovtyń quttyqtaýyn qala ákiminiń orynbasary Serik Seıdýmanov jetkizip, qala basshysynyń syılyǵy-temir tulpardy astyna mingizip, ústine zerli shapan japty.
Kesh barysynda ekinshi tulpardy mereıtoı ıesine óziniń týǵan jeri Almaty oblysy ákimdigi mingizdi. Oblys ákimi Ańsar Musahanovtyń quttyqtaýy men syılyǵyn apparattyń ókili Ardaq Sadyq jetkizdi. Ol sonymen qatar, Esmuhan Obaevqa oblystyń eń úlken syılyǵy bolyp tabylatyn - «Almaty oblysynyń qurmetti azamaty» ataǵy berilgendigin jarııa etip, ákimniń atynan medaldi tabystady.
Bunymen qatar, óner qaıratkerin Parlament depýttary Turarbek Asanov, Murat Ahmadıev, QR Jazýshylar Odaǵynyń tóraǵasy Nurlan Orazalın, T.Júrgenov atyndaǵy Óner akademııasynyń rektory Arystanbek Muhamedıuly quttyqtap, jyly lebizderin bildirdi.
Keshte sondaı-aq, QR Senat tóraǵasy Qaırat Mámıdiń, Astana qalasy ákimi Imanǵalı Tasmaǵanbetovtiń, Qyrǵyzstan jazýshylarynyń, sonymen qatar, Shyǵys Qazaqstan, Batys Qazaqstan, Qaraǵandy, Mańǵystaý oblystary ákimderiniń, Almaty qalasy barlyq bilim ordalarynyń quttyqtaýlary kelip túskendigi aıtyldy.
Kesh barysynda Esmuhan Obaevtyń rejısser, mádenıet qaıratkeri retinde atqarǵan jumystaryna baǵa berilip, shyǵarmashylyq ómirine sholý jasalyp, Qazaqstan óneri men mádenıetine, teatr salasyna sińirgen eńbegi atap ótildi.
Kesh mereıtoı ıesi basqaratyn Muhtar Áýezov atyndaǵy akademııalyq drama teatry ujymynyń sahna tarlanyna arnaıy daıyndaǵan qoıylymmen aıaqtaldy.
