Almatyda eski ǵımarattar qaıta jańartylady

ALMATY. QazAqparat - Almatyda burynǵy temirjol aýrýhanasynyń ornyna «Qalalyq balalardy ońaltý ortalyǵy» ashylady.

Bul týraly qala ákimi Erbolat Dosaevtyń Almaly aýdany turǵyndarymen kezdesýinde belgili boldy, dep habarlaıdy QazAqparat tilshisi.

Qala ákimimen kezdesýge kelgen turǵyndardyń biri burynǵy temirjol emhanasyna qatysty máseleni kóterdi.

«Men sáýletshi retinde burynǵy temirjol emhanasynyń taǵdyryna alańdaımyn – bul sáýlet eskertkishi. Qazir ǵımarat shatyrsyz tur. Onyń taǵdyry ne bolmaq?»,- dep surady Almaly aýdanynyń turǵyny.

Almaty ákimi Erbolat Dosaev bıyl atalǵan ǵımaratty kúrdeli jóndeýden ótetinin málimdedi.

«Jumystar sáýlet eskertkishin qalpyna keltirýge jáne saqtaýǵa qoıylatyn barlyq talaptardy eskere otyryp júrgiziletin bolady. Biz jóndeımiz, bárin retke keltiremiz. Balalarǵa arnalǵan zamanaýı ortalyq quraıyq. Bul jaǵdaıda biz ǵımarattyń jalpy kórinisin saqtaımyz. Ǵımarattyń jóndeý jumystary IV toqsannan bastalady»,- dedi qala basshysy.

Budan bólek, ol jyl sońyna deıin Áıteke bı kóshesindegi eski ǵımaratty buzyp, revmatologııalyq ortalyqtyń ornynda 500 kelýshige arnalǵan jańa emhana salý jobasy ázirlenetinin aıtty. Qurylys 2024 jyldyń kókteminde bastalady.