Almatyda eski 708 úı buzylady
ALMATY. QazAqparat - Almatyda 2021-2025 jyldarǵa arnalǵan turǵyn úı qoryn jańartý baǵdarlamasy bastaldy, onyń aıasynda 708 eski úıdi buzý jáne 683 turǵyn úı salý josparda, dep habarlaıdy QazAqparat tilshisi.
«Qalada eski ǵımarattar adamdardyń ómirine jáne densaýlyǵyna qaýip tóndiredi. Turǵyn úı qoryn jańartý baǵdarlamasy eski úılerdiń ornyna jańa fýnktsıonaldy jáne zamanaýı nysandar salýǵa múmkindik beredi. Sonymen birge, buzylǵan tozyǵy jetken úılerdiń aýmaǵynda turǵyn úıler ǵana emes, halyqqa jańa qyzmet kórsetý nysandary salynady, jańa jeliler tartylady, saıabaqtar, býlvarlar, alańdar, qoǵamdyq oryndar paıda bolady»,- dep habarlady «Almaty» ÁKK.
Buǵan deıin 2012-2015 jyldarǵa arnalǵan Almaty qalasynda apatty úılerdi buzýdyń pılottyq baǵdarlamasyna sáıkes, 56 eski úı súrilip, 63 kóppáterli turǵyn úı salynǵan bolatyn. Osy baǵdarlamanyń arqasynda 579 otbasy jańa páterge qonystandy.
Baǵdarlamadaǵy eski úılerdiń tizimi apatty baspana turǵyndarynyń aýdandyq ákimdikterine jıi júginýi negizinde quryldy.
Baǵdarlamanyń operatory - «Almaty» áleýmettik-kásipkerlik korporatsııasy» AQ.
Baǵdarlamada júzege asyrý mehanızminiń eki nusqasy qarastyrylǵan:
- «Almaty» ÁKK jáne jeke ınvestor júzege asyratyn jobalar;
- memlekettik qarjylandyrý arqyly júzege asyrylatyn jobalar.
Sondaı-aq baǵdarlamada Almaty qalasynyń ár aýdanynda tozyǵy jetken úılerdi buzý jáne jańa úıler salý kórsetilgen.
Almatyda turǵyn úı qoryn jańartýdyń 2021-2025 jyldarǵa arnalǵan baǵdarlamasy ÁKK saıtynda ornalastyrylǵan.
