Almatyda «Esirtkisiz álem» aktsııasy ótýde

Halyqaralyq esirtkige qarsy kúres kúnine oraı ótken bul sharany qalalyq kedendik baqylaý departamenti uıymdastyrdy. Onń maqsaty  - qalyń buqaranyń  nashaqorlyqqa qarsy oı-pikirin bólisý,  salaýatty ómir saltyn nasıhattaý arqyly Qazaqstannyń 2012-2016 jyldarǵa arnalǵan  nashaqorlyqpen kúres  jáne esirtki satý men tasymaldaýdyń aldyn alý  baǵdarlamasy aıasynda  mekemearalyq baǵdarlamany iske asyrý.

Aktsııanyń alǵashqy  kúni Almaty kedenshileri Ál-Farabı atyndaǵy Qazaq ulttyq ýnıversıtetiniń stýdentterimen kezdesti. Onda  esirtki  zattaryn  saqtaý, satyp alý, qoldanýǵa qatysty qylmystyq  jaýapkershilik pen onyń  aldyn alý máselesi sóz boldy. BUU men Dúnıejúzilik densaýlyq saqtaý uıymy  sarapshylarynyń aıtýynsha,  búgingi kúni nashaqorlyq álemde eń úlken qaýiptiń biri bolyp tabylady.

«Esirtki - adamnyń sanasyn jaýlap qana qoımaı, árdaıym ózine eliktiretin qasıeti bar hımııalyq zat. Esirtkiniń  geroın, kokaın, anasha, qarasora jáne taǵy basqa da  túrleri bar. Kóbinese esirtkini Aýǵanstan men Batys memleketterinde óndiredi. Ony qoldaný tásilderi kóp. Esirtki  ıne shanshý nemese dári sııaqty kapsýlalarda qoldanady», - deıdi Kedendik baqylaý departamenti bastyǵynyń orynbasary Ermek Qojabergenov.  Onyń aıtýynsha, búginde kedenshiler túrli arnaıy qurylǵy nemese arnaıy operatıvti jumys júrgizý barysynda der kezinde onyń kózin  joıý baǵytynda  tynymsyz eńbek etip kele jatyr.