Almatyda esirtkini jarnamalaǵan kóshe sýretshisi qamaýǵa alyndy

ALMATY. QazAqparat – Almaty qalasy Bostandyq aýdanynyń polıtsııasy esirtki quraldary men psıhotroptyq zattardy taratýǵa tyıym salǵan saıttardyń atyn jarnamalaǵan 25 jastaǵy er adamdy ustady, dep habarlaıdy QazAqparat tilshisi.

Buryn qylmystyq jaýapkershilikke tartylǵan A. esimdi azamatqa esirtki quraldary, psıhotroptyq zattar men olardyń analogtaryn nasıhattaý jáne zańsyz jarnamalaý aıyby taǵyldy.

«Esirtkini nasıhattaǵany nemese zańsyz jarnamalaǵany úshin qylmystyq jaýapkershilikti belgileıtin jańa zańǵa sáıkes, ustalǵan azamat QR QK 299-1 baby boıynsha bas bostandyǵynan aıyrylady. Ol tyıym salynǵan saıttardyń atyn kópqabatty úıler men ózge de úı-jaılardyń qabyrǵalaryna arnaıy spreı boıaý arqyly jazǵan. Árıne, ol osy qyzmeti úshin aqsha alǵan. Bul úshin zań 3 jyldan 6 jylǵa deıingi merzimge bas bostandyǵynan aıyrý túrindegi jazany qarastyrady. Qazir ol ýaqytsha ustaý ızolıatoryna qamaldy» - dedi Bostandyq aýdandyq polıtsııa basqarmasynyń bastyǵy Dáýren Ótebaev.