Almatyda esirtkini jarnamalaǵan eki er adam ustaldy

ALMATY. QazAqparat- Esirtki zattaryn jarnamalady degen kúdikpen eki adam ustaldy, dep habarlaıdy QazAqparat tilshisi.

Jibek joly kóshesinde ornalasqan keńselerdiń biriniń qyzmetkerleri polıtsııaǵa birneshe ret habarlasqan. Olar belgisiz bireýlerdiń esirtki jarnamasyn ǵımarattyń qasbetine jáne termınaldyń betine ilip ketkenin aıtqan.

«Búgin keńse kúzetshileri kúdikti eki adamdy baıqap qalyp, ýchaskelik ınspektorǵa habarlady. Bul adamdar bankomattyń qabyrǵasyna trafaretty qoldaný arqyly esirtkiniń jarnamasyn jabystyrǵan. Ekeýide polıtsııaǵa jetkizildi. Azamat M. Túrkistan oblysynyń týmasy 2000 jyly dúnıege kelgen. Ekinshi kúdikti 1997 jyly týǵan H., Almaty oblysynyń týmasy. Ustalǵandardyń aıtýynsha, olar jarnama úshin kúnine 15 myń teńge tapqan. Olardyń mindeti halyq kóp jınalatyn jerlerge 30 jazbany jabystyrý bolǵan», - dedi Medeý aýdanynyń polıtsııa basqarmasynyń bastyǵy Bolat Totybaev.

Aıta ketsek, ustalǵan eki kúdikti buǵan deıin de urlyq jáne bopsalaýshylyq úshin jaýapqa tartylǵan.