Almatyda esirtkini palaýdiń ishine salyp túrmege ótkizbek bolǵan adam ustaldy
ALMATY. QazAqparat – Almatyda túrmege esirtkiniń palaýdyń ishine salyp ótkizbek bolǵan er adam ustaldy, dep habarlaıdy QazAqparat tilshisi.
Almaty qalalyq PD baspasóz qyzmetiniń habarlaýynsha, 24 jastaǵy er adam esirtkini palaýdyń ishine jasyryp, túrmege kirgizbek bolǵan. Sot-hımııalyq saraptamasynyń qorytyndysyna sáıkes, tárkilengen zattyń jalpy salmaǵy 67 gramm bolatyn «gashısh» esirtkisi ekeni anyqtaldy.
«Kúdikti SI-18 ǵımaratyna sálemdeme jibergen kezde ustaldy. Osylaısha, ustalǵan adamdarǵa esirtki tapsyrý áreketi toqtatyldy. Jetkizýshi Almaty qalasynda turatyn N.esimdi er adam. Oǵan qatysty QR ÁQbK-niń 296-baby 2 bólimi (esirtki, psıhotroptyq zattardy, olardyń analogtaryn, prekýrsorlaryn satý maqsatynsyz zańsyz daıyndaý, óńdeý, ıemdený, saqtaý, tasymaldaý) boıynsha sotqa deıingi tergeý júrgizilip jatyr. N. ýaqytsha ustaý ızolıatoryna qamaldy», - dedi Almaty qalalyq PD Esirtki bıznesine qarsy kúres basqarmasynyń basshysy Erlan Álmaǵambetov.
