Almatyda esirtkimen kúresýshilerdiń senim telefonyna 250 habarlama túsken

ALMATY. QazAqparat - Jyl basynan beri Almatynyń esirtki qylmysymen kúresýshileriniń senim telefonyna 250-ge jýyq habarlama túsken, dep habarlaıdy QazAqparat tilshisi.

Qalada esirtkige qarsy ımmýnıtetti qalyptastyrýǵa erekshe nazar aýdarylady. Nashaqorlyqtyń aldyn alýǵa baǵyttalǵan 56 syrtqy jarnamalyq tabloıd – bılbordtar shyǵaryldy. Olar adamdar kóp jınalatyn jerlerde, sondaı-aq, 79 LED ekranda ornalastyrylǵan.

«Aqparattyq kórneki taqtalarda 8-705-549-70-25 «senim» telefony kórsetilgen. Jyl basynan beri azamattardan esirtkini taratý týraly aqparatty qamtıtyn graffıtı syzbalaryn qoldaný faktileri týraly 216 aqparat tústi. Jazýdyń barlyǵy óshirildi. Sonymen qatar, «Qazaqstan eriktiler lıgasy» qoǵamdyq birlestiginiń atsalysýymen ishki ister organdarynyń jaǵymdy ımıdjin qalyptastyrý maqsatynda «Almaty esirtki trafaretinsiz» naýqany ótkizilip jatqanyn atap ótken jón. Trafaretpen boıalǵan jazýlardyń ornyna Qazaqstan Respýblıkasy Qylmystyq kodeksiniń 299-1 babynyń normalaryn túsindiretin aqparattyq paraqtar ornalastyrylǵan. Jyl basynan beri qala aýmaǵynda esirtki zaty bar 361 graffıtı-syzba tabyldy jáne ústinen boıaldy», – dedi Almaty qalalyq Polıtsııa departamenti bastyǵynyń orynbasary Berik Ábilbekov.

Esirtkige qatysty qylmysqa qarsy kúres basqarmasynyń habarlaýynsha, buǵan deıin Bostandyq aýdanynda graffıtı-sýretterin salǵany úshin ustalǵan er adam úsh jylǵa bas bostandyǵynan aıyrylǵan.