Almatyda esirtki jarnamalaǵan turǵyn ustaldy

ALMATY. QazAqparat – Almatylyq polıtseıler arnaıy is-shara barysynda esirtki jarnamalaǵan er adamdy ustady, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, ustalǵan Ş esimdi azamat buǵan deıin, ıaǵnı 2008 jyly esirtki qylmysy úshin sotty bolǵan.

«Jazasyn ótep shyqqan kúdikti eski isin qolǵa alyp, qylmystyq zańnamany buzdy. Ol esirtkini onlaın satyp alýǵa bolatyn resýrstarǵa trafarettik jarnamalar salǵan. Kúdikti óz qylmysyn moıyndady. Ol buǵan deıin Áýezov, Alataý jáne Jetisý aýdandarynda ornalasqan ǵımarattarǵa jazý jazǵan. Oǵan jumys istegeni úshin elektrondy ámııan arqyly aqsha tólegen», – deıdi departamenttiń esirtki qylmysyna qarsy kúres basqarmasy bastyǵynyń orynbasary Saǵyndyq Aıaǵanov.

Sonymen qatar kúdiktini tekserý barysynda birneshe saıttyń mekenjaılary jazylǵan trafaretter men boıaýlar tabyldy jáne tárkilendi.

«Onyń is-áreketi QK-tiń 299-1 babymen saralandy. Esirtki quraldaryn, psıhotroptyq zattardy nemese olardyń analogtaryn, prekýrsorlaryn nasıhattaý nemese zańsyz jarnamalaý – úsh jylǵa deıingi merzimge bas bostandyǵynan aıyrylýy múmkin», - deıdi Saǵyndyq Aıaǵanov.