Almatyda esirtki satýshylar bankterdegi 49 shot arqyly aqsha alyp otyrǵan

ASTANA. QazAqparat – Almaty polıtseıleri esirtki qylmysyna qarsy is-qımyl departamentimen jáne Qarjy monıtorıngi agenttigimen birlesip, messendjer arqyly esirtki satqandardyń jolyn kesti, dep habarlaıdy QazAqparat.

Marıhýanany jetkizý jáne satý aǵymy boıynsha 5 adam anyqtaldy: erli-zaıypty jup, olardyń dosy, kepilger jáne kýrer.

«Jedel jáne tergeý is-sharalary barysynda anyqtalǵandaı, jas jubaılar qylmystyq protsesti basqaryp otyrǵan. Olar uıymdastyrýshy jáne úılestirýshi rólderin atqarǵan. Kepilgerler mindetin 1993 jáne 1995 jyly týǵan 2 almatylyq ózara bólisken, al kýrer – olardyń 25 jastaǵy seriktesi», - dedi QR ІІM baspasóz qyzmetiniń ókili Shuǵyla Turlybek mınıstrliktiń brıfınginde.

Qylmyskerler esirtki paketterin Ispanııa men AQSh-tan poshta arqyly alǵany anyqtaldy. Klıentter tólemdi Qiwi ámııany arqyly jasaǵan.

«Qolma-qol aqshany alý ekinshi deńgeıli bankter arqyly júzege asyrylǵan. Tergeýdiń osy kezeńinde 49 bank shoty belgili boldy. Qatysýshylardyń qylmystyq áreketteri resmı túrde qujattaldy, «qupııa satyp alý» júrgizildi, sanktsııalanǵan tintý júrgizildi. Bas fıgýranttardyń páterinen 6 mln teńge, SIM-kartalar, bank kartochkalary, elektrondy tarazylar, sondaı-aq erekshe ıisi bar ósimdiktektes zattar tabyldy. Ustalǵandar qamaýǵa alyndy», - dedi Shuǵyla Turlybek.