Almatyda esirtki satýmen aınalysqan qylmystyq top músheleri sottaldy
ALMATY. QazAqparat - Almatyda esirtki satýmen aınalysqan qylmystyq top músheleri uzaq merzimge bas bostandyǵynan aıyryldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, buǵan deıin Almatydaǵy esirtki qylmysymen kúresýshiler maqsatty jedel-izdestirý is-sharalary kezinde megapolıs aýmaǵynda «gashısh «esirtkisin satýmen jáne taratýmen aınalysqan qylmystyq topty áshkerlegen.
«QR QK-niń 297-baby 4-bóligimen tirkelgen qylmystyq is aıasynda júrgizilgen jedel-izdestirý sharalary barysynda A.esimdi azamattyń zańsyz Almaty qalasynyń aýmaǵynda esirtki zattaryn satý jáne saqtaý maqsatynda Almaty qalasynyń aýmaǵynda uıymdasqan top quryp, oǵan jetekshilik etkendigi anyqtaldy. Bul fakt boıynsha QR QK-niń 262-baby 1 jáne 2-bóligi – qylmystyq uıymnyń uıymdasqan tobyn qurý jáne basqarý, sondaı-aq olarǵa qatysý boıynsha da qylmystyq ister tirkeldi. Tekserý nátıjıesinde ustalǵandardan bir travmatıkalyq tapansha, bir tegis uńǵyly myltyq jáne olarǵa arnalǵan oq-dári, sonymen qatar, jalpy salmaǵy 4keli 868,38gr esirtki zaty «gashısh» tárkilendi», – dedi Almaty qalalyq PD esirtki qylmystaryna qarsy kúres basqarmasynyń bastyǵy Erlan Almaǵambetov.
Ustalǵan adamdarǵa qatysty QR QK-niń 262 baby 1,2 bóligi, 297-baby 4-bóligi, 287-baby 2-bóligi, 302-baby 2-bóligi boıynsha qylmystyq is qozǵaldy.
« 2020 jyldyń 30 jeltoqsanynda Almaty qalasynyń qylmystyq ister jónindegi mamandandyrylǵan aýdanaralyq sotynyń qaýlysymen barlyq uıymdasqan qylmystyq top músheleri ózderine qatysty áreketter úshin kináli dep tanyldy, qylmystyq toptyń basshysy, A.azamatqa 17 jylǵa bas bostandyǵynan aıyrý túrindegi jaza taǵaıyndaldy, qylmystyq toptyń qalǵan tórt múshesi 16 jylǵa bas bostandyǵynan aıyryldy», – dedi Almaty qalalyq PD Tergeý basqarmasy bóliminiń bastyǵy Ádil Salaev.
