Almatyda esirtki satýmen aınalysqan erli-zaıyptylar sottaldy
Almaty qalalyq Polıtsııa departamentiniń taratqan málimetine sáıkes, sotqa deıingi tergeý Nıklıaevtardyń psıhotrop zattardyń zańsyz aınalymyna qatysty qylmystyq quqyq buzýshylyq jasaǵanyn anyqtaǵan.
«Olardyń qylmystyq áreketi birqatar jedel jáne arnaıy shara barysynda rastaldy. A.Nıklıaevanyń jáne onyń kúıeýi Nıklıaevtyń turǵylyqty jerinen untaq zaty bar qaǵaz orama men polıetılen paketter, esirtkini keıinnen satý úshin oraýǵa arnalǵan quraldar tabylyp tárkilendi», – dedi Almaty qalalyq PD tergeý basqarmasy bóliminiń bastyǵy Ádil Salaev.
Sot-medıtsınalyq saraptamanyń qorytyndysyna sáıkes, sottalýshylardyń turǵylyqty jerinde tintý kezinde alynǵan psıhotroptyq zat – pırrolıdınovalerofenon ekeni belgili boldy.
«Qylmystyq istiń materıaldarynan kúdiktiler qylmystyq áreketti úıinde jasaǵany, olardyń kámeletke tolmaǵan eki balasy bolǵany anyqtaldy, balalar ata-analarynyń zańsyz áreketine kýá bolǵan, bul olardyń psıhıkasyna áser etti. Qylmystyq is óndirispen aıaqtalyp, Almaty qalasynyń qylmystyq ister jónindegi mamandandyrylǵan aýdanaralyq sotyna jiberildi», - deıdi Ádil Salaev.
Sot úkimimen Nıklıaevtar kináli dep tanylyp, árqaısysy 10 jylǵa bas bostandyǵynan aıyryldy.
