Almatyda esirtki satqan 75 jastaǵy áje sottaldy
ALMATY. QazAqparat - 75 jastaǵy almatylyq keıýana esirtkini zańsyz saqtaǵany jáne satqany úshin sottaldy, dep habarlaıdy «Qazaqparat»HAA tilshisi Almaty qalalyq qylmystyq ister jónindegi mamandandyrylǵan aýdanaralyq sotynyń baspasóz qyzmetine silteme jasaı otyryp.
«Almaty qalalyq qylmystyq ister jónindegi mamandandyrylǵan aýdanaralyq sotynda Qazaqstan Respýblıkasy Qylmystyq kodeksiniń 297 babynyń 3 bóligi 3 tarmaǵy boıynsha (esirtki zattarynyń zańsyz aınalymy) qylmys jasaǵan A-ǵa qatysty qylmystyq isti qaraý aıaqtaldy. Sot 2016 jyly 31 shildede A. S-ǵa jalpy salmaǵy 0,23 gramm iri mólsherde «geroın» esirtkisin 4 000 teńgege zańsyz satqany anyqtady», - delingen habarlamada. Budan basqa, 2016 jylǵy 2 tamyzda A-nyń úıinde kýágerlerdiń qatysýymen júrgizilgen tintý barysynda jalpy salmaǵy 4,21 gramm asa iri mólsherde atalǵan esirtki quraly tabylyp, tárkilendi.
Sot úkimimen A. QR Qylmystyq kodeksiniń 297 babynyń 3 bóligi 3 tarmaǵynda kózdelgen qylmysty jasady dep tanyldy jáne oǵan múlkin tárkileý jáne qatań rejimdegi túzeý kolonııasynda jazasyn óteý úshin 13 jyl bas bostandyǵynan aıyrý jazasy taǵaıyndaldy. QR QK-niń 14 babynyń 2 bóligi 2 tarmaǵy negizinde A. áreketinen qylmystyń qaýipti belgileri tanyldy. Úkim kúshine engen joq.
