Almatyda esirtki satatyn 450 saıt buǵaqtaldy

ALMATY. QazAqparat - Almatyda 380 keli esirtki, onyń ishinde 15 keli sıntetıkalyq esirtki tárkilendi. Bul týraly Almaty qalalyq polıtsııa departamentiniń bastyǵy Qanat Taımerdenov aıtty, dep habarlaıdy QazAqparat tilshisi.

«Esirtki qylmysyna qarsy kúres salasynda Polıtsııa departamenti jedel jumys júrgizip jatyr. Biz sıntetıkalyq esirtkilerdi shyǵaratyn úsh esirtki zerthanasyn joıdyq. Internet-resýrstar arqyly sıntetıkalyq mefedron esirtki zatyn daıyndaý jáne satýmen aınalysqan eki uıymdasqan qylmystyq toptyń joly kesildi. Bıylǵy jyldyń basynan beri taǵy bir esirtki zerthanasyn anyqtadyq, onda 150 mıllıon teńgeniń esirtki shıkizaty tárkilendi», – dedi Qanat Taımerdenov.

Eriktiler men belsendi azamattardyń arqasynda esirtkiniń taralýy týraly aqparat bar bes myń graffıtı-jazbalar boıaldy. Esirtki satatyn 450 ınternet-saıt buǵaqtaldy.

«Sonymen qatar, qalanyń oqý oryndarynda da esirtkige qarsy taqyryptar boıynsha 260 profılaktıkalyq is-shara júrgizildi. Osy jyly da bul baǵyttaǵy barlyq is-sharalar jalǵasyn tabady jáne erekshe baqylaýda bolady», – polıtsııa departamentiniń bastyǵy.

Osyǵan deıin Qazaqstanǵa sıntetıkalyq esirtki jetkizip kelgen transulttyq arnanyń joly kesilgenin jazdyq.