Almatyda esirtki kúresine arnalǵan keńeıtilgen otyrys ótti
ALMATY. Tamyzdyń 6-sy. QazAqparat /Erbol Turymbetov/ - Keshe Almaty qalasy Alataý ákimdigi apparatynyń májilis zalynda esirtkimen kúreske arnalǵan keńeıtilgen otyrys ótti, dep habarlaıdy QazAqparat.
Ony aýdandyq prokýratýra men aýdandyq ishki ister basqarmasy jáne Almaty qalalyq ІІB-nyń esirtki bıznesimen kúres jónindegi ókilderi birlese uıymdastyrdy. Jıynǵa jergilikti ózin-ózi basqarý uıymdarynyń tóraǵalary men halyq kóp jınalatyn «Bolashaq», «Evrazııa», «Qulager» saýda ortylyqtarynyń basshylary da qatysty. Otyrysta esirtki bıznesimen kúres jónindegi aǵa ınspektor E. Ábdiráshev pen aýdandyq prokýror kómekshisi Ǵabıt Dúısembaevtar baıandama jasap, esirtkimen kúres jónindegi arnaıy beınebaıandamalar kórsetti.
Al Alataý aýdanynyń bas prokýrory Qanat Mamaevtyń málimdeýinshe, aýdan boıynsha bıyldyń ózinde esirtkige baılanysty 29 qylmystyq is tirkelgen. Osy máselege qatysty jaqynda ǵana turǵyndar arasynda «Aýdannyń qaı bólikterinde esirtki tabýǵa bolady jáne onyń taralymyna ne jaǵdaı yqpal etedi?» degen saýalnama júrgizilip, jaýaptar alynǵan. Jınalys barysynda jaýapty qyzmetkerlerge aýdanda bir aı kóleminde barlaý júrgizip bolǵan soń, halyq arasynda qaıtadan saýalnama júrgizý tapsyryldy.
Sonymen qatar, búgingi tańda eń ózekti máselelerdiń birine aınalyp otyrǵan esirtkimen kúreste, quqyq qorǵaý organdarynyń senim telefondaryna habarlasý arqyly halyq óz úlesin qosa alady. Senim telefondary: 298 50 64, 253-36-36, 253 38 38.
