Almatyda esirtki daıyndap, saqtaǵan «Mad Men» tobynyń músheleri sottaldy
Almaty qalasynyń qylmystyq ister jónindegi mamandandyrylǵan aýdanaralyq sotynda «Q-pop Mad Men» tobynyń múshelerine qatysty qylmystyq topty qurý, oǵan jetekshilik etý, asa iri mólsherde psıhotroptyq zattardy daıyndaý, saqtaý, ótkizý faktileri boıynsha qylmystyq is qaraldy.
Sottyń baspasóz qyzmetiniń málimetinshe, 2020 jyly qyrkúıek aıynyń basynda H. esimdi azamat qylmystyq top qurǵan. Onyń quramyna 6 adam kirdi. Barlyǵy zańsyz mefedron psıhotroptyq zatynyń balamasyn daıyndap, keıinnen ótkizip jiberý úshin esirtki zatyn (gashıshti) saqtap kelgen. Qylmystyq toptyń jetekshisi H. mefedron óndirýge arnalǵan quramdas bólikterdi alýmen aınalysyp, satyp alýshylarmen kelissózder júrgizgen. Toptyń basqa músheleri Almaty qalasynda zerthana retinde jabdyqtalǵan kottedjdiń jertólesinde psıhotroptyq zattardy óndirip, olardy bólek dozaǵa salyp, quny týraly aqparatty arnaıy qurylǵan saıttar men chattarda jarııalaǵan. Toptyń qalǵan músheleri Almatydaǵy qoǵamdyq oryndarǵa betbelgi qoıýmen aınalysqan.
Sotta prokýror aıyptaýdy qoldap, qylmystyq toptyń basshysyn 18 jylǵa, al qalǵan qatysýshylardy 17 jyldan 17,5 jylǵa deıin bas bostandyǵynan aıyrýdy surady.
«Sot úkimimen H. uıymdasqan top qurý jáne oǵan jetekshilik etý, asa iri kólemde ótkizý maqsatynda psıhotroptyq zattyń analogyn zańsyz daıyndaý, saqtaý, esirtkini elektrondyq aqparattyq resýrstardy paıdalaný arqyly uıymdasqan toptyń quramymen satý maqsatynda saqtaý qylmystaryn jasaǵany úshin kináli dep tanyldy. Ol 17 jylǵa bas bostandyǵynan aıyryldy. Qalǵan qatysýshylardyń úsheýine 16 jyl, taǵy birine 15 jyl, 3 aıǵa bas bostandyǵynan aıyrý jazasy taǵaıyndaldy», - dep habarlady qalalyq qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Sottalýshylardyń jastary men buryn sottylyǵy joqtyǵy jeńildik túrinde tanyldy. Sonymen qatar, sottalýshy S-nyń kinásin ishinara moıyndaýy jeńildetetin mán-jaı dep tanyldy. Úkim zańdy kúshine engen joq.
Buǵan deıin habarlaǵanymyzdaı, Meıirjan Tórebaev pen Meıirhan Shernııazovqa qatysty sot qaýlysy ózgerissiz qaldy.
