Almatyda esiritkige baqylaý jasaý salasyndaǵy óńirlik yntymaqtastyq máseleleri talqylanady
ASTANA. Jeltoqsannyń 7-si. QazAqparat /Qanat Mámetqazyuly/ - Jeltoqsannyń 8-9 aralyǵynda Almaty qalasynda Esirtkige baqylaý jasaý salasyndaǵy óńirlik yntymaqtastyq boıynsha ózara túsinistik týraly memorandým taraptarynyń 8-shi kezdesýi ótedi.
Bul týraly búgin Syrtqy ister mınıstrliginde ótken dástúrli brıfıng barysynda málim boldy, dep habarlaıdy QazAqparat.
«Sharaǵa shet memleketterdiń syrtqy ister mınıstrleri men ishki ister mınıstrleri jáne olardyń orynbasarlary deńgeıindegi delegatsııalar qatysady. Sonymen birge, jıynǵa halyqaralyq uıymdar men esirtkige qarsy qurylymdardyń ókilderi jáne Esirtki quraldarynyń, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi Ortalyq Azııa óńirlik aqparattyq úılestirý ortalyǵynyń donor memleketteri qonaq retinde shaqyrylǵan. Jıyn barysynda esirtki aınalymymen kúresý, suranysty tómendetý jáne aldaǵy ýaqyttaǵy osy máselelerge qatysty aımaqtyq yntymaqtastyq máseleleri talqylanady, dep kútilýde», dedi brıfıngte Syrtqy ister mınıstrliginiń resmı ókili Erjan Ashyqbaev.
Onyń aıtýynsha, shara barysynda Memorandýmǵa qatysýshylardyń aýqymdy jobasy bolyp tabylatyn Ortalyq Azııa óńirlik aqparattyq úılestirý ortalyǵynyń ınaýgýratsııasyn ótkizý josparlanǵan. Esterińizge sala keteıik, 1996 jyldyń mamyrynda Tashkent qalasynda Esirtki quraldarynyń, psıhotroptyq zattar men olardyń prekýrsorlarynyń zańsyz óndirilýin, aınalymyn jáne teris paıdalanýyn baqylaý salasyndaǵy ózara túsinistik pen yntymaqtastyq týraly memorandýmǵa Ortalyq Azııa elderiniń syrtqy ister mınıstrleri jáne BUU Esirtki qylmysy jónindegi basqarmasynyń atqarýshy dırektory qol qoıǵan bolatyn. Keıin memorandýmǵa Reseı, Ázirbaıjan jáne Aga Han damý qory qosylǵan.
Ortalyq Azııa óńirlik aqparattyq úılestirý ortalyǵyn qurý týraly kelisimge 2006 jyldyń shildesinde qol qoıylsa, 2009 jyldyń qyrkúıeginen bastap kelisim kúshine enýi úshin qajetti rásimder jasalǵannan keıin Almaty qalasynda Ortalyqtyń shtab-páteri ornalasyp, tolyqqandy halyqaralyq uıym retinde jumysyn bastaǵan bolatyn.
