Almatyda eshkimge aǵa-kóke emespin – Erbolat Dosaev
Jetisý aýdanynyń turǵyndarymen kezdesýde qala turǵyny dúken jáne kafesi bar kásipkerdiń ústinen shaǵymdandy.
«Bókeıhanov kóshesindegi dámhananyń ıesi óz aýmaǵyn zańsyz keńeıtip jatyr. Kafeniń aýmaǵy tipti tabıǵı qorǵalatyn aýmaqqa, ıaǵnı Esentaı ózenine deıin jetti. Ol jerde jazǵy kafe salmaqshy. Jumystardy bastap ketti. Ol bizdiń eskertýlerge qulaq aspaıdy. Onyń sengen myqty kókesi bar ǵoı deımin», - dedi qala turǵyny.
Erbolat Dosaev qalada kim-kimniń aǵa-kókesi ekenin, olardyń nemen aınalysatynyn bilmeıtinin aıtty.
«Men qalada kim-kimniń aǵa-kókesi ekenin, olardyń nemen aınalysatynyn bilmeımin. Men ózim qalada eshkimge de aǵa-kóke emespin jáne aýdan ákimderine de bireýlerge olaı bolýǵa ruqsat etpeımin. Biz sizder sekildi qarapaıym kisilermiz. Eger sotpen dáleldenbese, bizge ondaı máselelerdi astarlap aıtýdyń qajeti joq», - dedi qala ákimi.
Almaty basshysy, sondaı-aq atalǵan máseleni sheshý úshin aýdan ákimine hattamalyq tapsyrma beretinin, eger qalasa qala turǵyny onyń janynda erip júrýine bolatynyn qosa aıtty.
