Almatyda Esentaı ózeniniń jaǵalaýynda jańa qoǵamdyq keńistik paıda boldy
ALMATY. QazAqparat- Almatyda Esentaı ózeniniń jaǵalaýyn abattandyrý jumystaryn qorytyndylaýǵa baılanysty baspasóz-týry ótti, dep habarlaıdy QazAqparat tilshisi.
Esentaı ózeniniń jaǵalaýynda sý bólgishten Jamaqaev kóshesine deıingi aralyqta jańa formattaǵy qoǵamdyq keńistik qurý boıynsha jumystar aıaqtalýǵa jaqyn, uzyndyǵy 4,2 shaqyrym jaıaý júrginshiler joly jasalyp, ózenniń jaǵalaýy bekitildi.
«Abattandyrý jobasy tabıǵı landshafty saqtaı otyryp, qalalyqtardyń jaıly demalysyna jaǵdaı jasaýǵa baǵyttalǵan bolatyn. Munyń negizinde zamanǵa saı ınfraqurylymdy tabıǵatqa barynsha zııan keltirmeıtindeı etip jasaý ıdeıasy jatyr», – dedi baspasóz-týry barysynda Almaty qalalyq Ekologııa jáne qorshaǵan orta basqarmasynyń bólim jetekshisi Murat Jeksenbaev.
Sondaı-aq abattandyrý jumystary aıasynda uzyndyǵy 1,3 shaqyrym aǵash qorshaý jáne tireýish qabyrǵa ornatyldy.
«Sonymen qatar, 600-deı qylqan japyraqty jáne japyraqty aǵash, 3500-den astam buta jáne shamamen 700 sharshy metr kópjyldyq jáne 100 sharshy metr birjyldyq ósimdikter otyrǵyzyldy. Budan bólek, 339 jaryq sham, 8 oıyn alańy men sport alańy, 4 tabıǵatty tamashalaý alańy men pandýstar, 4 pergola, 2 modýldik dárethana, sý jaǵasyna 10 oryndyq, 130 qoqys jáshigi jáne jaǵalaý boıyna 70 oryndyq qoıyldy»,- dep atap ótti spıker.
