Almatyda Esentaı ózeniniń arnasyn tazartý bastaldy
Esentaı ózeniniń betondy kanalyn tazartý jumystary Abaı dańǵylynan Sátbaev kóshesine deıingi ýchaskede bastaldy. Atalǵan ýchaske «Qazseldenqorǵaý» MM ekologııa jáne qorshaǵan ortany qorǵaý basqarmasynyń qaraýyna berildi.
«Sońǵy ret ózen arnasyn keshendi tazartý jáne jaǵalaýdy jóndeý jumystary 10 jyldan astam ýaqyt buryn júrgizilgen. Sonyń saldarynan tóselgen qıma tas ábden eskirgen. Burynǵy jyldary ózen arnasyn tazartý sýdyń ótýin qamtamasyz etý úshin kezeńmen júrgizildi. Ózen arnasyn zertteý kezinde bıiktigi 1,5 metrge deıin laı men qoqystyń edáýir jınalǵany baıqaldy. Arnany bulardan tazartý úshin aýyr arnaıy tehnıkany tartý qajet boldy»,- dep habarlady qala ákimdiginen.
Bul ýchaskede ózen arnasyna mamandandyrylǵan tehnıkanyń júrýi tehnologııalyq jaǵynan qarastyrylmaǵan: kirme joldar joq nemese apatty jaǵdaıda bolǵan. Búginde jumystarǵa 2 shaǵyn júk tıegish, ekskavator jáne aýyr tehnıka jumyldyryldy. Eseptik derekterge sáıkes Abaı dańǵylynan Sátbaev kóshesine deıingi ýchaskedegi tunba men qumnyń kólemi – shamamen 3,5 myń tekshe metr.
Tazalaý jumystary 1 mamyrǵa deıin aıaqtalady dep josparlanyp otyr.
Aıta keterligi, kirme joldarda aýyr tehnıkanyń saldarynan bolǵan zalal merdiger uıymnyń kúshimen qalpyna keltiriledi. Trotýardy qalpyna keltirý jumystary júrgizilýde.
Budan basqa, Ekologııa jáne qorshaǵan ortany qorǵaý basqarmasy Esentaı ózeniniń ál-Farabı dańǵylynan Rysqulovqa deıingi arnasyn kúrdeli jóndeýdiń jobasyn ázirleýde. Jobada túrli is-sharalarda arnaýly tehnıkany paıdalanýdyń tehnologııalyq syzbalary qarastyrylatyn bolady. Joba aıasynda qala turǵyndaryna yńǵaıly bolý úshin ózen jaǵalaýyn abattandyrý jumystary júrgizilip, serýendeý aımaǵy uıymdastyrylady.