Almatyda erteń tótenshe jaǵdaı rejımi tolyq aıaqtalady

ALMATY. QazAqparat- Almatyda erteń tótenshe jaǵdaı rejımi tolyq aıaqtalady, dep habarlaıdy QazAqparat tilshisi.

Almaty komendatýrasy 19.01.2022 jyly saǵat 00:00-de Almatyda tótenshe jaǵdaı men komendanttyq saǵattyń aıaqtalatynyn málim etti.

Alaıda Almaty aýmaǵynda antıterrorlyq is-shara rejımi jáne terrorıstik qaýiptiliktiń «qyzyl» deńgeıi saqtalady.

«Terrorızmge qarsy is-sharalar aıasynda Almaty qalalyq polıtsııa departamenti, Ulttyq ulannyń jáne QR qorǵanys mınıstrliginiń áskerı qyzmetkerleriniń kúshteri qalany táýlik boıy patrýldeýdi qamtamasyz etedi. Blokposttar jumysyn jalǵasady.Terrorlyq qaýip-qaterdiń «qyzyl» deńgeıinde quqyq qorǵaý organdaryna azamattardyń zattaryn, kólik quraldaryn jeke tintýge, sondaı-aq olardyń qozǵalysyn ýaqytsha shekteýge nemese tyıym salýǵa ruqsat etilgenin eske salamyz. Sherýler men mıtıngterge tyıym salynady»,- delingen habarlamada.

Antıterrorlyq is-shara rejıminiń aıaqtalý merzimi áli belgisiz.

Eske salaıyq, 5 qańtarda Prezıdent Qasym-Jomart Toqaevtyń jarlyǵymen eldegi jaǵdaıǵa baılanysty Tótenshe jaǵdaı jarııalanyp, túngi saǵat 23: 00-den tańǵy 7: 00-ge deıin komendanttyq saǵat engizilgen bolatyn.