Almatyda erteń eskertý dabyly qaǵylady
ALMATY. QazAqparat - Almatyda erteń «Qonys-2017» aktsııasy aıasynda eskertý dabyly qaǵylady, dep habarlaıdy QazAqparat tilshisi.
Bul tabıǵat apaty bolǵan jaǵdaıda qala halqyn habarlandyrý jáne qaýipsiz jerge kóshirýge basqarý organdaryn, azamattyq qorǵanys ókildikterin jumyldyrý maqsatynda júrgizilip otyr.
Praktıkalyq is-shara Bostandyq aýdanyndaǵy №93 mektepte ótedi.
Mektep ishinde evakýatsııalyq pýnkt ashylyp, qalalyq TJD jyljymaly núktesi ornalasady. Munda kóshirilgen halyqty tirkeý, Almaty oblysynyń qaýipsiz jerlerine jiberý sharalary ótkiziledi.
Sonymen qatar, Almaty-2 temir jol vokzalynda Departament qyzmetkerleri jınalǵan halyqty Jambyl, Qaraǵandy oblysyna jiberedi.
Aıta ketý kerek, byltyrdan beri Almatyda ár aıdyń alǵashqy beısenbisinde 12:55-te tótenshe jaǵdaılar týraly daıyndyq dabyly qaǵylady. Bul dabyl júıeleriniń jumysyn tekserýge baǵyttalǵan.
Osy ýaqyt aralyǵynda radıo tolqyny men telearnalardyń ekranynan efır úzilip, dabyl júıeleriniń jumysyn tekserý týraly habarlama taratylady.
